«ՀՀ-ում առաջին տնտեսական աճը եղել է 1994-ին: Դա ռեկորդ է ամբողջ ԱՊՀ-ում՝ ներառյալ Մերձբալթյան երկրները, ներառյալ Արեւելյան Եվրոպան: 1995-ին էլ էր ռեկորդ: Դուք ունեցել եք կրկնակի տնտեսական աճ, դրա որակին էլ կանդրադառնամ: Այդ կրկնակի տնտեսական աճին, հատկապես երկրորդ նախագահի օրոք դուք առաջինը չեք եղել այլեւս: Ես իմ խնդիրը լուծել եմ եւ զարգացրել եմ, Ադրբեջանը սկել ա, ու կրել եմ իրենց: Բոլոր հաղթանակները ես եմ տարել ե՛ւ օդուժի պաշտպանության եւ տնտեսական աճի հարցում»,- ՀԱԿ խմբակցության պատգամավոր Հրանտ Բագրատյանն այսպես իր կարծիքն ասաց կառավարության ներկայացրած Սահմանամերձ համայնքներում գործունեությունը հարկերից ազատելու մասին օրենսդրական փաթեթի հետ կապված, որը քննարկվում է ԱԺ-ում:
Նա իր այդ դիտարկմամբ, մասնավորապես պատասխանեց ՀՀԿ պատգամավոր Վարդան Այվազյանին, որը երեկ իր ելույթում նախկին ժամանակներից դրվագներ էր հիշեցնում Բագրատյանին՝ ասելով, թե ինչպես է իրեն մերժել տեղական բյուջեն առանձնացնել համապետականից, երբ Չարենցավանի քաղաքապետ էր:
Հրանտ Բագրատյանն անդրադարձավ Քոչարյանի ժամանակվա տնտեսական աճին՝ 13 տոկոս՝ դա կապելով «ՎիվաՍելի» եւ «ԱրմենՏելի» մուտքի հետ. «Երբ մի բանը մյուսին վաճառում ես՝ աճ է տալիս: 100 անգամ երկրորդ նախագահին բացատրել ենք, շարունակում է գրքեր գրել այդ մասին: Եթե դուք ուշադիր լինեիք, կիմանայիք, որ սխալ մոտեցմամբ կարելի է խաղալ ՀՆԱ-ի հետ: Նախորդ վարչապետը 6 տարում ունեցել է 7 տոկոս աճ: Բանը քննադատելուց առաջ ասեք մի բան, որ ճիշտ լինի: Մասնագիտական խորը պատրաստվածություն է պահանջում, որ իմանաք ինչն ինչոց է»:
Ըստ Հրանտ Բագրատյանի, պետք է բարեխիղճ գտնվել եւ անկախ նրանից՝ Սերժ Սարգսյանը կզայրանա, թե չի զայրանա, պետք է ճիշտ թվերը նրան ներկայացնել, ճիշտ պատկերը:
Կարդացեք նաև
Հրանտ Բագրատյանը կառավարության անդամներին դաս տվեց՝ ասելով, որ հարկային արտոնությունները ընդհանրապես լավ բան չեն, հիշեք միշտ. «Աշխարհն ասում է՝ եկեք էլ հարկային արտոնություն չտանք: Եթե դուք ստիպված եք հարկային արտոնություն տալ, դա աշխատում է միայն ճյուղային կառուցվածքը փոփոխելով: Ինչ վերաբերում է սահմաններին, ի՞նչ է ստանում գյուղացին դրանից: Ոչինչ: Սենց բան ո՞նց կարելի է անել: Սա քանդում է պետությունը: Ասում եմ, ո՞ւմ համար եմ ասում: Կատաստրոֆա է այստեղ: Ես գալիս եմ, անկեղծորեն կիսվում եմ ու ասում ձեզ կարեւոր բաներ, անկախ նրանից, թե որն է մեր հայացքները»:
ԱԺ փոխնախագահ Հերմինե Նաղդալյանն էլ իր ելույթում Հրանտ Բագրատյանին հիշեցրեց իր թվերը. «Ձեր ժամանակ Ճյուղային հարկային արտոնությունը հիշում ենք, դուք ինչի՞ եք մոռացել եւ այսօր միայն միակողմանի դատում եք»: Նրան լռեցրեց ԱԺ նախագահ Գալուստ Սահակյանը՝ հորդորելով նախկին ժամանակները չհիշեցնել:
Հռիփսիմե ՋԵԲԵՋՅԱՆ
