Հոկտեմբերի 22-ին, Հոլանդիայից ժամանած «Կռունկ» սիրողական երգչախումբը ելույթ ունեցավ Ախալքալաքի Սուրբ Խաչ Եկեղեցում:
Ջավախքի ընդհանուր առաջնորդական փոխանորդ Տեր Բաբգէն վրդ Սալբիայնն իր օրհնությունն ու գնահատանքը բերեց «Կռունկ» սիրողական երգչախմբի անձնակազմին, մաղթելով նորանոր բեմեր ու վերելքներ:
Ախալքալաքի Սուրբ Խաչ եկեղեցում «Կռունկ»-ը կատարեց հինգ հայկական երգ, հանդիսատեսին զարմացնելով իրենց հայերեն արտասանությամբ ու երգեցողությամբ: Սիրողական այս երգչախումբն առանձնակի սիրով, ընկալմամբ ու ջերմությամբ է կատարում Սայաթ-Նովա:
Հոլանդիայից ժամանած «Կռունկ»-ը արհեստավարժ երգչախումբ չէ, կազմված է հիմնականում երգարվեստին նվիրված ամենատարբեր մասնագիտությունների տեր մարդկանցից, սակայն դա չի խանգարում վերջիններիս կատարել հրաշալի երգեցողությամբ ու հայերեն արտասանությամբ հայերեն երգեր:
Կարդացեք նաև
Երգչախումբը երգում է մի քանի լեզուներով՝ հայերեն, վրացերեն, ռուսերեն և այլն: «Կռունկ»-ի 23 անդամները չգիտեն հայերեն ոչ գրել, և ոչ էլ կարդալ, սակայն նրանք հրաշալի զգում են հայ երգը: «Կռունկ» սիրողականը կատարում է Կոմիտասի, Խաչատուր Ավետիսյանի, Սայաթ–Նովայի և այլոց հեղինակած երգերը:
Ախալքալաքի Սուրբ Խաչ եկեղեցու երգչախումբը հյուրերի համար հանդես եկավ մի քանի կատարումներով, որից հետո բոլորը հանպատրաստից միասին սկսեցին կատարել «Ազգ իմ փառապանծ» երգը:
«Կռունկ»-ը ոչ միայն ծափահարություններ ու հիացմունք «կորզեց» ջավախքյան հանդիսատեսից, այլև զարմանք ու երջանկության արցունքներ:
Հաջորդիվ «Կռունկ»-ը ելույթ կունենա Թբիլիսիի հայկական «Հայարտուն» մշակութային կենտրոնում:
Նշենք, որ Հոլանդիայից ժամանած այս սիրողական երգչախմբի բարեգործական ելույթները Հայաստանում, Ջավախքում և Թբիլիսիում իրականություն դարձավ «Արշավներ» խմբի ղեկավար Ռուբեն Բաղդիշյանի և «Կարոտ» պարային խմբի ղեկավար Լուսինե Բունիաթովայի ջանքերի շնորհիվ:
Ջավախքի ընդհանուր առաջնորդական փոխանորդության մամլո դիվան
