«Ժողովրդի ցասումը բավարար է լինում, որպեսզի իշխանությունը ստիպված լինի հեռանալ»,- այսօր` հոկտեմբերի 22-ին, «Պոստ սկրիպտում» մամլո ակումբում լրագրողների հետ հանդիպման ընթացքում հայտարարեց ՀԴԿ ղեկավար Արամ Գասպարի Սարգսյանը:
Սակայն նրա կարծիքով` չնայած այն հանգամանքին, որ հասարակության մոտ դժգոհություններն ավելանում են, այսօր Հայաստանում այդպիսի իրավիճակ չկա. «Հարցը նրանում է, թե ո՞վ է այսօր խոսում երկրին անհրաժեշտ փոփոխությունների մասին, եթե նախկին ՀՀՇ-ականները, որոնք այսօր ՀԱԿ են կոչվում, ես էլ հո իմ հիշողությունը չեմ կորցրե՞լ, չգիտե՞մ թե նրանք ինչպես են կառավարել: Միանգամից ինչպե՞ս փոխվեցին, ինչպե՞ս խելոքացան, ինչպե՞ս փոխվեց իրենց մտածելակերպը: Չկա այդպիսի բան, որ հիմա գան արդար կառավարեն, արդար կառավարող էին, թո’ղ 90-ականներին էլ կառավարեին»:
Արամ Սարգսյանը կարծում է, որ եռյակը սակարկություններ է անում իշխանության հետ: Նա հետաքրքիր է համարում` ինչո՞ւ այդ ուժերը իրենց հուզող հարցերը չեն բարձրաձայնել խորհրդարանում. «Մի տարի է անցել, այդ ի՞նչ հեղափոխական տրամադրությունների փոփոխություն եղավ իրենց մոտ: Եթե դա քաղաքական կոնյուկտուրա չէ, ապա պետք է հասկանալ կոնկրետ ի՞նչ ծրագիր են ուզում իրականացնել, բայց այդպիսի ծրագիր դեռեւս չկա: Եթե դուք պատրաստվում եք օլիգարխիան վերացնել, ինչպե՞ս է դա լինելու` իրենք իրե՞նց պետք է սնանկացնեն»:
Ամի ՉԻՉԱԿՅԱՆ
