Դեռեւս հուլիս ամսին Կապանի եւ Մեղրու տարածաշրջաններն ընդգրկող թիվ 38 ընտրատարածքից ԱԺ պատգամավոր ընտրված, ՀՀԿ-ական Արմեն Կարապետյանը մեզ տված հարցազրույցում խիստ քննադատել էր այդ ժամանակ Սյունիքի մարզպետի պաշտոնը թողած Սուրիկ Խաչատրյանին եւ նրա գործելաոճը: Նա մասնավորապես նշել էր, որ Սուրիկ Խաչատրյանի ղեկավարման տարիներին մարզում բարոյահոգեբանական մթնոլորտում խնդիրներ կային, ինտրիգները բավականին շատ էին եւ այդ ամեն ինչի համար մեղավոր էր համարում Սուրիկ Խաչատրյանին:
«Նախկին մարզպետի ժամանակ ինտրիգները բավականին շատ էին, այդ ձեւը չի ընդունվում ո’չ պետության կողմից, ո’չ պետական կառույցների կողմից: Պաշտոնյան պետք է իր աշխատանքում կիրթ լինի ու պետք է այնպես իրեն հասարակության մեջ պահի, որ դա օրինակ լինի մնացածների համար, բայց Սուրիկ Խաչատրյանը չկարողացավ դա պահպանի, ցանկացած միջոցառման ընթացքում բավականին ինտրիգներ է ստեղծել, մթնոլորտը փչացրել: Կարծում եմ՝ դա վերացել է մեր ազգաբնակչության շրջանում եւ կարծես թե արդեն մարդիկ նորմալ փոխհարաբերվում են, նորմալ աշխատանք է ընթանում», – հուլիս ամսին Aravot.am-ին տված հարցազրույցում նշել էր Արմեն Կարապետյանը:
Վերջինս Սուրիկ Խաչատրյանի ղեկավարման տարիներին Կապանի քաղաքապետն էր, այնուհետեւ Սյունիքի մարզպետի խորհրդականը: Նա այդպես էլ հստակ չբացատրեց, թե ինչու է որոշել հենց այդ ժամանակ բարձրաձայնել եւ քննադատել Սուրիկ Խաչատրյանի գործելաոճը եւ ոչ թե միասին աշխատելու տարիներին:
«Սուրիկ Խաչատրյանի կողմից ընդունված ցանկացած որոշման հիմքում թաքնված էր իր անձնական շահը կամ ցանկացած միջոցառման ընթացքում ու հետո վատ մթնոլորտ էր ստեղծում: Նմանատիպ արարքները թույլ չեն տվել բարոյահոգեբանական մթնոլորտ ստեղծվի Սյունիքում, որն այսօր արդեն գոյություն ունի մեր մարզում:
Կարդացեք նաև
Մեր միջեւ տարաձայնություններն արդեն այն աստիճանի էին, որ ամեն մեկն աշխատում էր իր գործը, իր պարտականությունները կատարի: Այդ տեսանկյունով էր արդեն աշխատանքն իմ եւ իր մեջ կատարվում: Ինքն այն չէր, որ կարողանար ինձ այլ ուղղությամբ ուղղորդեր, բայց ամբողջ ընթացքում իր կողմից ինտրիգներ էին ստեղծվում», – ասել էր պարոն Կարապետյանը:
Հատկանշական է, որ ընդամենը մի քանի ամիս առաջ Սուրիկ Խաչատրյանին անկաշկանդ քննադատող Արմեն Կարապետյանը մի քանի օր առաջ` Կապանի օրվան նվիրված միջոցառման ժամանակ, խուսափեց խոսել Սուրիկ Խաչատրյանի մասին եւ պատասխանել մեր այն հարցին, թե ինչպե՞ս է ինքը վերաբերվում այն փաստին, որ Սուրիկ Խաչատրյանը կրկին ստանձնել է Սյունիքի մարզպետի պաշտոնը եւ ղեկավարում է մարզը:
Արմեն Կարապետյանն առանց որեւէ բացատրություն տալու` հրաժարվեց պատասխանել մեր հարցին եւ գնաց դեպի միջոցառման դահլիճ, որտեղ այդ ժամանակ գտնվում էր նաեւ Սուրիկ Խաչատրյանը:
Մանրամասները` տեսանյութում
Մերի ՍՈՂՈՄՈՆՅԱՆ
Հազարերեսանի քծնողների ոհմակ:
Անցած տարվա հունիսին Կապանի «Խուստուփ» TV-ի Սասուն Մանուկյանն էլ գրել էր,որ եթե Լիսկան վերադառնա հենց ի՛նքը Լիսկայի «հախից կգա»: Այսօր Կապանի ՀՀԿ-ական/հանքային նույն «Խուստուփ» TV -ի եթերում օր ու գիշեր Լիսկային են ցույց տալիս:
Լրագրող կոչվածին:
Արմեն Կարապետյանը Կապանի ամենահաջողված քաղաքապետն էր, և նա մտավ դահլիճ, որտեղ գտնվում էին շատ հարգված կապանցիներ: Ի դեպ Կապանի մշակույթի պալատը պարոն Խաչատրյանի սեփականությունը չէ:
Լրագրողը տեղեկատվություն փնտրող, հավաքող, ստացող, պատրաստող և խմբագրող է, ոչ թե ինտրիգներ ստեղծող:
Կապանում մինչև հիմա դեռ լավ քաղաքապետ չի՛ եղել. այլապես քաղաքը այդ օրին չէր լինի:
Այս «պատգամավոր» Արմեն Կարապետյանը Կապանի ՀՀԿ Խորհրդի նախագահ (բիզնեսմեն) Արարար Կարապետյանի եղբայրն է: Իսկ վերջինս Կապանի «Խուստուփ» TV-ի 60% բաժնետերն է: Սաղ իրար արժեն: