Սահմանամերձ համայնքներում գործունեությանը հարկային արտոնություն տալու կառավարության ներկայացրած օրինագծի փաթեթի քննարկման ժամանակ այսօր ԲՀԿ պատգամավոր Միքայել Մելքումյանը ԱԺ-ում ֆինանսների փոխնախարար Վախթանգ Միրումյանին հարցրեց. «Կցանկանայի ազդեցության գնահատումը տայիք: Ոչ թե քանակն է կարեւոր՝ 47 համայնքում եք հաշվարկել, այլ թե ինչ տնտեսական կարողություն կա այդ համայնքներում: Դուք հաշվարկե՞լ եք, թե 1 տարի հետո ի՞նչ աճ է լինելու, դուք աճ ակնկալո՞ւմ եք, թե՞ ուղղակի գոյատեւումն են ապահովելու»:
Հետո պարոն Մելքումյանը հարցրեց՝ «Եթե մայր օրենք է, ուրեմն երեք ընթերցում է պետք է անցնի: Իմ կողմից հեղինակած Պետտուրքի մասին նախագիծը արժանացել է կառավարության դրական եզրակացությանը, մտել է օրակարգ, առաջին ընթերցմամբ արդեն անցել է, այս քառօրյայի օրակարգում է, նույն օրենքն է, գրեթե նույնաբովանդակ, հիմա դուք ուզում եք այս փաթեթի մեջ այդ նույն պետտուրքի օրենքը՝ 24 -ժամյա ռեժիմով անցկացնել:
Այսինքն ի՞նչ եք կարծում, իհարկե, հեղինակային որեւէ խնդիր չկա, բայց դուք տեղյա՞կ եք եղել, որ այսպիսի օրենք կա: Կառավարությունը դրական եզրակացություն է տվել, ամիսներ շարունակ անցել է, հիմա դու այդ նույն օրենքը բերում եք, ուզում եք անցկացնեք: Սա ի՞նչ վերաբերմունք է: Ո՞նց եք վերաբերվում մեր աշխատանքին: Միգուցե հանեք սա ձեր փաթեթից, որովհետեւ այս քառօրյայում դա քննարկվելու է»:
Վախթանգ Միրումյանը պատասխանեց, որ այն նախագիծը, որը ներկայացրել է կառավարությունը եւ այն նախագիծը, որը Միքայել Մելքումյանն է ներկայացրել, ուներ էական տարբերություններ. «Կառավարությունը հանդես է եկել համակարգային կարգավորման տարբերակով»:
Կարդացեք նաև
Ինչ վերաբերում է սահմանամերձ համայնքներում աճ ունենալուն՝ նա պատասխանեց. «Մենք չենք ակնկալում, որ այդտեղ մանրածախ առեւտուրը լայն թափ է առնելու, որովհետեւ սահմանամերձ տարածաշրջանները սպառման սահմանափակումների խնդիր ունեն»:
Հռիփսիմե ՋԵԲԵՋՅԱՆ
