«Նախախորհրդարանի» մի խումբ անդամներ այս պահին հավաքվել են Ազատության հրապարակում: Ի նշան բողոքի, նրանք պատրաստվում են երթ սկսել դեպի ոստիկանություն: Նրանք դատապարտում են հոկտեմբերի 19-ին՝ կիրակի օրը, «Նախախորհրդարանի» անդամ Ալեք Ենիգոմշյանի հետ կատարվածը:
Հիշեցնենք, որ միջադեպը տեղի է ունեցել այդ օրը՝ քաղաքում կարմիր գծանշանների եւ տուգանքների բարձր չափերի դեմ պայքարող ավտոերթի ժամանակ, քաղաքացիական հագուստով ոստիկանների եւ «Նախախորհրդարանի» անդամ Ալեք Ենիգոմշյանի միջեւ:
Քաղաքացիական հագուստով ոստիկանները կանգնեցնելով մեքենան ճանապարհի մեջտեղում՝ կույր Ալեք Ենիգոմշյանին հանել են մեքենայից, թողել ճանապարհի մեջտեղում, իսկ վարորդին տարել ոստիկանության բաժին:
«Նախախորհրդարանի» անդամները պահանջում են քրեական գործ հարուցել քաղաքացիական հագուստով այդ ոստիկանների նկատմամբ եւ պնդում են, որ ոստիկանապետի հայտարարությամբ սկսված ծառայողական քննությունը անիմաստ է: «Ի՞նչ ծառայողական քննություն, քրեական գործ պետք է սկսվի: Ծառայողական քննությունը ոչինչ չի պարզելու: Մենք այս ռեժիմից ոչինչ չենք ակնկալում, որովհետեւ ոչինչ չեն անելու: Ոստիկանների այդ գործողությունները հանցագործություն են, դրա համար պահանջում ենք հարուցել քրեական գործ»,- ասաց «Նախախորհրդարանի» անդամ Վիգեն Նազարյանը:
Արփինե ՍԻՄՈՆՅԱՆ
Կարդացեք նաև
Լուսանկարը՝ a1plus.am-ի
