«Ես առայժմ ոչ մի արտառոց բան քաղաքական դաշտում չեմ տեսնում, նույնիսկ միտինգները դարձել են բավականին ընթացիկ»,- այսօր՝ հոկտեմբերի 21-ին, «Պոստ սկրիպտում» մամլո ակումբում լրագրողների հետ հանդիպման ընթացքում հայտարարեց քաղտեխնոլոգ Կարեն Քոչարյանը:
Նա համարում է, որ հոկտեմբերի 10-ին տեղի ունեցած հանրահավաքը տարբերվում է 2007-2008 թվականների հանրահավաքներից նրանով, որ այն ժամանակ մարդիկ ինչ-որ ակնկալիքներով իրենք էին գալիս Ազատության հրապարակ. «Լրիվ այլ է, երբ մարդուն բերում են: Այստեղ խնդիրը նրանում էր, որ շատ շատերը այդ հրապարակի ժողովուրդը չէին, իրենք բերվել էին այդ հրապարակ, իսկ հրապարակի ժողովրդի էներգետիկան լրիվ այլ է լինում»:
Ըստ Կարեն Քոչարյանի՝ եթե այդ բերված հանրությանը մարդիկ միանան, շատ բաներ կարող են փոխվել, սակայն, եթե իրավիճակը նույնը մնա, ոչ մի բան չի կարող փոխվել. «Այստեղ մարդիկ չգիտեն, թե ինչ են ուզում: Այն մարդը, որ գալիս է հրապարակ, գիտի, թե ինչ է ուզում լսել: Տարբերությունը դա է»:
Անդրադառնալով Հայաստանի՝ Եվրասիական տնտեսական միությանը ինտեգրմանը՝ նա նշեց, որ քաղաքական ուժերի 90 տոկոսը կողմ է այդ ինտեգրմանը: Բացառություն են կազմել Ազատ դեմոկրատները, «Ժառանգություն» կուսակցության մի հատվածը եւ մի քանի անհատներ. «Այդ կողմնորոշումը, սկսած 1994 թվականից, նույնն է եղել, դա էլ նորություն չէ»:
Կարդացեք նաև
Ամի ՉԻՉԱԿՅԱՆ
