Այսօր ԱԺ-ում Կարեն Անդրեասյանը պատասխանեց պատգամավորների բողոքներին ու քննադատություններին, որոնք հնչել էին իր 2013-ի զեկույցի եւ անձամբ իր հասցեին:
Զեկույցը ներկայացնելիս պաշտպանը խնդրել էր պատգամավորների աջակցությունը՝ խնդիրների լուծման համար: Պատգամավորներից ոմանք հեգնեցին օմբուդսմենին, որ մի քիչ ուժեղ եղեք, ձեր մանդատն ավելի ուժեղ է, դուք մեզանից եք օգնություն խնդրում, այդքան խեղճ մի եղեք:
Կարեն Անդրեասյանն այսօր նրանց պատասխանեց. «Կարեն Անդրեասյանը ոչ մեկի պաշտպանության կարիքը չունի, ոչ մեկի այդ դահլիճում: Պաշտպանության կարիք ունի օմբուդսմենի ինստիտուտը, դա նշանակում է շահերի պաշտպանությունը ձեր ընտրողների եւ իմ դիմումատուների: Եթե որեւէ բան չի բավարարում մեզ, չի նշանակում, որ դրա մասին չպիտի խոսենք այս բարձր ամբիոնից: Մենք ունեցել ենք դեպքեր, երբ պատգամավորներից գեթ մեկը անդրադարձ է ունեցել եւ դրանից հետո բան է փոխվել: Մենք միամիտ չենք եւ հասկանում ենք, որ քաղաքական բարդ խնդիրները ժամանակ են պահանջում: Բայց թեկուզ այդ 150-ի մեջ կան հարցեր, որոնք ոչ մի քաղաքական բարդ խնդիր էլ չեն: Դրանց մասին է խոսքը, որ կարելի է մեկ-մեկ ընդհանուր այս թեժ մթնոլորտից դուրս բերելով արդյունավետ լուծումներ ստանան»:
Նա ասաց, որ իշխանական եւ ոչ իշխանական ուժերից ստացել է բազմաթիվ կառուցողական առաջարկներ, բոլորն էլ հաշվի է առնելու եւ քայլեր է ձեռնարկելու:
Կարդացեք նաև
ՀԱԿ խմբակցության պատգամավորներ Արամ Մանուկյանը,Լեւոն Զուրաբյանը դժգոհել էին, որ Մարտի 1-ի մասին պաշտպանը հպանցիկ է անդրադարձել իր զեկույցում: Կարեն Անդրեասյանը բացատրեց, որ իրենք ոչ թե ցանկություններով են առաջնորդվում, այլ՝ օրենքով, իսկ օրենքը թույլ չի տալիս իրեն ընթացիկ դատական գործերում միջամտություն. «Օրենքը թույլ չի տալիս չավարտված գործերով գնահատականներ տալ: Օրենքն ինձ թույլ է տալիս անել այն ամենը, ինչ տեսնում եք զեկույցում»:
Վերջում Կարեն Անդրեասյանը վստահեցրեց, որ իր տարիքն իրեն բավականացնում է իր աշխատանքը կատարել պատշաճ. «Ես իմ տարիքով եւ հոգեվիճակով բավական հաջող անում եմ այս գործը, ուզում եմ անել ավելի հաջող»:
Հռիփսիմե ՋԵԲԵՋՅԱՆ
