Այսօր ՀԱԿ խմբակցության պատգամավոր Նիկոլ Փաշինյանը Մարդու իրավունքների պաշտպանի 2013-ի տարեկան զեկույցի մասին իր ելույթում տակտիկապես քննադատեց եռյակի ուժերին եւ նրանց իշխանափոխության քայլերը: Նիկոլ Փաշինյանը վստահեցրեց, որ 2008-ի Մարտի 1-ի դեպքերն իրապես կբացահայտվեն միայն իշխանափոխությունից հետո, բայց մի ճշտում մտցրեց. «Եթե իշխանափոխություն ասելով նկատի ունենք իշխանափոխություն, ոչ թե իշխանության տրանսֆորմացիա՝ կուլիսային պայմանավորվածությունների հիման վրա:
Սա կարեւոր նրբություն է, որովհետեւ ապրում ենք այնպիսի ժամանակներում, երբ մարտիմեկյան ոճիրին մասնակից օլիգարխների եւ պաշտոնյաների հռչակավոր ցուցակը հրապարակած քաղաքական ուժը աջուձախ ինդուլգենցիաներ է բաժանում՝ այդ ցուցակում ընդգրկված եւ չընդգրկված այնպիսի անձանց, որոնք ակնհայտորեն առնչություն ունեն մարտիմեկյան ոճիրը կազմակերպելու հետ: Ոմանք սա համարում են ռեալ պոլիտիկ, ոմանք՝ հանճարեղ քաղաքագիտական հանցագործություն: Իմ մոտեցումն այդ ամենին մի փոքր այլ է եւ հարկ եմ համարում արձանագրել՝ ոչ ոք չի մոռացվել, ոչինչ չի մոռացվել: Եվ մարտիմեկյան ոճիրի յուրաքանչյուր մասնակից պետք է սպասի, որ արդարադատությունը բացելու է իր դուռը: Արդարադատությունն անպայման գալու է իր ետեւից»:
Հռիփսիմե ՋԵԲԵՋՅԱՆ
