Այսօր ԱԺ նիստում ՀԱԿ խմբակցության պատգամավոր Նիկոլ Փաշինյանը Մարդու իրավունքների պաշտպանության եւ հանրային հարցերի հանձնաժողովի նախագահ, ԲՀԿ պատգամավոր Էլինար Վարդանյանին առաջարկեց խորհրդարանական լսումներ կազմակերպել՝ քաղբանտարկյալների թեմայով:
«Ժառանգության» պատգամավոր Զարուհի Փոստանջյանն այս մասով այլ առաջարկություն արեց: Նրա խոսքերով՝ «Միայն լսումներով չպետք է սահմանափակվենք, պետք է այլ գործիքներ էլ օգտագործենք, օրինակ, լյուստրացիայի ենթարկենք բոլոր դատավորներին, որոնք 2007-ից են սկսել հետապնդումները»:
Ըստ Զարուհի Փոստանջյանի, այդ դատավորները գործիք են գործադիր իշխանության ձեռքին, սա արդեն արատավոր բնույթ է կրում եւ երկար ժամանակ է գործում: Նա հիշեցրեց, որ իրենց գործընկեր Ալեքսանդր Արզումանյան էլ քաղբանտարկյալ էր:
Նա հարցրեց Էլինար Վարդանյանին. «Ի՞նչ կարող է անել Մարդու իրավունքների հանձնաժողովը, որ բացի բարոյական աջակցությունից ֆինանսական աջակցություն էլ ցուցաբերենք: Վոլոդյա Ավետիսյանը բազմազավակ հայր է, ունի լուրջ սոցիալական խնդիրներ»:
Զարուհի Փոստանջյանն առաջարկեց հաշվեհամար բացել:
Կարդացեք նաև
Էլինար Վարդանյանի խոսքերով՝ հաշվեհամար բացելն այնքան էլ հանձնաժողովի գործը չէ, բայց յուրաքանչյուր պատգամավոր կարող է նման նախաձեռնությամբ հանդես գալ. «Եթե դուք այսպիսի մի բան նախաձեռնեք, ես սիրով կմիանամ ձեզ: Ինչ վերաբերում է դատավորների անունները հրապարակելուն, հասկանում եք, որ սա համակարգային խնդիր է: Այնպես չէ, որ մեկ դատավորը գործիք է, մյուսը գործիք չէ, կախված է նրանից, թե ինչպես ՄԻՊ-ի զեկույցում է գրված, որ դատավորին կգա հրահանգը: Ուստի այստեղ պետք է բոլոր դատավորների անունները հրապարակել, որովհետեւ բոլորն էլ այդ համակարգի պայմաններում կախված են եւ ուղղորդվում են»:
Զարուհի Փոստանջյանը դժգոհել էր, որ ՀՀ նախագահ Սերժ Սարգսյանը նախապես, մինչ դատավճիռը հայտարարել էր, որ Շանթ Հարությունյանը հանցագործ է եւ պետք է դատապարտվի, այդպիսով, ուղղորդել էր դատարանին: Այս առնչությամբ Էլինար Վարդանյանն ասաց, որ իսկապես անմեղության կանխավարկածը շատ կարեւոր է. «Տարբեր պաշտոնյաներ կանխավ հայտնել են իրենց տեսակետը՝ խախտելով անմեղության կանխավարկածի իրավունքը: Ինձ համար դա անընդունելի է, երբ այնպիսի մի անձ է նման հայտարարություն անում, որը կարող է ուղղորդում հանդիսանալ ներքին օղակներում աշխատողների համար»:
Զարուհի Փստանջյանի խոսքերով՝պետք է գոնե հայտարարություն անենք, հրապարակենք դատավորների անունները, որոնք քաղաքական հայացքների համար դատավճիռ են կայացրել եւ ազատազրկել մարդկանց. «Մենք պետք է հասնենք նրան, որ այդ դատավորները տան հրաժարականներ: Եթե հանդիսանում են գործիք, ապա հանրությունը պետք է հասկանա նրանց գործիք լինելը եւ զգուշանա»:
Էլինար Վարդանյանը չհամաձայնեց՝ կրկին բացատրելով, որ բոլոր դատավորներն էլ ուղղորդվում են առանձին հարցերի հետ կապված:
ԱԺ փոխխոսնակ Հերմինե Նաղդալյանը պատգամավորներին հիշեցրեց, որ դատավորներն էլ մարդիկ են, իրենց իրավունքներն ունեն. «Մեր դատողություններով եւ գործողություններում կուզենայի, որ մարդու իրավունքների սահմանը չանցնել»:
Հռիփսիմե ՋԵԲԵՋՅԱՆ
