Հոկտեմբերի 17-ին ընդհանուր իրավասության դատարանը հրապարակեց խուլիգանության մեջ մեղադրվող Շանթ Հարությունյանի եւ նրա ընկերների դատավճիռը: Ըստ այդմ՝ նրանք դատապարտվեցին՝ 1-7 տարի ազատազրկման, իսկ Շանթի անչափահաս որդին՝ Շահենը, դատապարտվեց 4 տարվա պայմանական ազատազրկման:
Ըստ «Ժառանգություն» կուսակցության պատգամավոր Զարուհի Փոստանջյանի՝ Շանթի եւ նրա ընկերների հանդեպ կայացրած դատավճիռների հիմնական նպատակը «ազատատենչ քաղաքացիներին հիշեցնելն է, որ ռեժիմը անխնա հետապնդելու է բոլոր ընդվզումները, նույնիսկ անչափահասի»: Տիկին Փոստանջյանը հիշեցրեց. «Ռեժիմի ներկայացուցիչ մի պաշտոնյա ասել էր, որ «հեղափոխությունը խեղդելու է օրորոցում», այս պատժամիջոցի հրապարակումն այդ տրամաբանության մեջ է»:
Քաղաքացիական ակտիվիստ, «Բանակն իրականում» նախաձեռնության անդամ Զարուհի Հովհաննիսյանի համար այս դատավճիռը՝ հատկապես 15-ամյա Շահենի վերաբերյալ, նախ եւ առաջ՝ «պարզ վրեժխնդրություն» էր:
«Շահենը կրում է իր պապի անունը, ով դիսիդենտական պայքարի առաջամարտիկներից է եղել, հետո նրա գործը շարունակեց Շանթը, իսկ հիմա իր որդուն է պատրաստում նույն պայքարին: Ցավոք, մենք 25 տարի լինելով անկախ, դարձյալ վերադարձանք նույն կետին՝ դիսիդենտական պայքարին, ու դա ոչ միայն փորձում են կանխել, այլև ամեն կերպ զսպել ու պատժել:Պատիժն, իհարկե,ի ցույց կդնեն, որպեսզի մյուսները չփորձեն պայքարել Հայաստանի ազատության ու անկախության համար: Չնայած՝ նման քայլերն էֆեկտիվ լինել չեն կարող, պայքարող խմբերը շարունակելու են իրենց գործունեությունը՝ տարբեր մեթոդներով»,-ասաց Զարուհի Հովհաննիսյանը:
Կարդացեք նաև
Մելանյա ԲԱՐՍԵՂՅԱՆ
