ՀՀ արդարադատության նախարար Հովհաննես Մանուկյանն այսօր Գյումրիում մասնակցեց Գյումրու քաղաքացիական կացության ակտերի գրանցման տարածքային բաժնում էլեկտրոնային համակարգի ներդրման պաշտոնական գործարկմանը:
Նշենք, որ այս համակարգն առաջինը ներդրվել է Գյումրիում ` Եվրոպական միության աջակցությամբ և արդեն մեկ տարի է` կիրառվում է:
Այսօր այս իրադարձությանը մասնակից էր նաև Հայաստանում Եվրոպական միության պատվիրակության ղեկավար, դեսպան Տրայան Հրիսթեան:
Նախարարն ու փոխնախարար Սուրեն Քրմոյանը բավական մանրամասն ներկայացրեցին համակարգի առավելությունները, այս համակարգը քաղաքացիներին կազատի ավելորդ փաստաթղթատարությունից: Այս կերպ ավելի հեշտությամբ և ավելի կարճ ժամկետում կտրամադրվեն ծննդի, որդեգրման, հայրության ճանաչման, ամուսնության, ամուսնալուծության, անվանափոխության և այլնի մասին տեղեկանքներ: 4-5 հոգի ելույթ ունեցան, ամենավերջում ձայն տրվեց Գյումրու քաղաքապետ Սամվել Բալասանյանին: Քաղաքապետը, իր խոսքը ուղղելով Եվրամիության պատվիրակության ղեկավարին, հորդորեց նրան բոլոր նման ծրագրերը մեկնարկել Գյումրիից: «Մեր նախարարը նույնպես ծնունդով գյումրեցի է, և նա համաձայն կլինի, որ բոլոր մեկնարկները տրվեն Գյումրիից »,- ասաց Սամվել Բալասանյանը:
Կարդացեք նաև
Նախարար Հովհաննես Մանուկյանը, որն արդեն իսկ ավարտել էր իր ելույթը այս իրադարձության շուրջ, շարունակեց Սամվել Բալասանյանի խոսքը: «Ես իմ խոսքի մեջ, որ ասացի՝ Գյումրին պատահական չէր ընտրված, պատահական չէր, մի բան պիտի ասեմ, որ բոլորդ գիտեք ու բոլորդ ուրախանալու եք` իսանը ուրդի՞ց կեղնի ( սա գյումրեցիներին հատուկ խոսք է, որի գրական տարբերակն է` մարդը որտեղի՞ց է լինում ): Էս, իհարկե, հումորով, բայց անկախ ամեն ինչից, անկախ այս ծրագրի կարևորությունից, մենք պետք է Գյումրի քաղաքը շեշտադրենք, որովհետև Գյումրին այսօր ունի ուշադրության կարիք, Գյումրին մեր երկրորդ մայրաքաղաքն է:Եվ դա նաև կառավարության ծրագիրը, ներքաղաքականությունն է տարածքային զարգացման, տարածքային ամրապնդման, որ մեր ազգի հույսը միայն Երևանը, մայրաքաղաքը չլինի», -ասաց նախարարը:
Մանրամասները` տեսանյութում:
Նունե ԱՐԵՎՇԱՏՅԱՆ
