Այսօր աշխատանքային այցով Գյումրի ժամանած արդարադատության նախարար Հովհաննես Մանուկյանը Շիրակի մարզպետարանում տարբեր բողոքներ ունեցող քաղաքացիների ընդունելուց հետո մի քանի րոպեանոց մամուլի ասուլիս տվեց:
Լրագրողներից մեկը նրան խնդրեց իր գնահատականը հնչեցնել երեկ Կենտրոն եւ Նորք Մարաշ վարչական շրջանների ընդհանուր իրավասության դատարանի` «Ցեղակրոն» կուսակցության նախագահ Շանթ Հարությունյանի, նրա անչափահաս որդու և ընկերների մասին կայացրած որոշման շուրջ: Սակայն, նախարարը ձեռնպահ մնաց գնահատական տալուց:
«Առաջին ատյանի դատական ակտին ես այս պահին ձեռնպահ կմնամ որևէ գնահատական տալուց, որովհետև այդ դատական ակտը օրինական ուժի մեջ մտած չէ: Ամենայն հավանականությամբ, ենթադրում եմ, որ այդ դատական որոշումը կբողոքարկվի վերաքննիչ դատարան: Եվ նաև դա ի նկատի ունենալով՝ և նպատակ ունենալով զերծ մնալ որևէ ազդեցությունից դատական համակարգի նկատմամբ՝ մասնավորապես վերաքննիչ դատարանի` ես որևէ մեկնաբանություն չեմ անի»-, ասաց նախարարը:
Իսկ այն հարցին` մի՞թե Սերժ Սարգսյանը Կոլումբիայի համալսարանում չխախտեց Շահեն Հարությունյանի անմեղության կանխավարկածը, նրան իր հայտարարությամբ հանցագործ անվանելով, նախարարն ասաց. «Հայտարարության վերաբերյալ ես առիթ ունեցել եմ պատասխանել. մեկ ամիս առաջ այս հարցադրումը հնչել է, և ես պատասխանել եմ: Կարծում եմ, որ այստեղ անմեղության կանխավարկածի խնդիր չի առաջանում, որովհետեւ, եթե մենք խոսում ենք այդ նույն տեսանյութի մասին, որը հայտնվեց համացանցում, և կոնկրետ ուսանողի հարցադրմանը երկրի նախագահն պատասխան էր տալիս: Այստեղ ես ընդամենը արձանագրել եմ մի բան, որ հանրապետության նախագահը հռետորական հարցադրում է արել, թե օրինակ` կոնկրետ արարքի, կոնկրետ գործողության, կոնկրետ հանցագործության համար ինչպիսի հետևանք կարող է ունենալ որևէ այլ երկրում, օրինակ` ԱՄՆ-ում: Այսինքն կոնկրետ անձի ուղղված չի եղել, կոնկրետ անուն չի հնչել և դա եղել է հռետորական հարցադրում, և ես` թե որպես նախարար, թե որպես իրավաբան, անմեղության կանխավարկածի խախտում չեմ տեսնում»:
Կարդացեք նաև
Մանրամասները` տեսանյութում:
Նունե ԱՐԵՎՇԱՏՅԱՆ
