ՀՀ արդարադատության նախարար Հովհաննես Մանուկյանն այսօր աշխատանքային այցով վաղ առավոտից Գյումրիում էր: Նա իր ծննդավայր ոտք դնելուն պես, Շիրակի փոխմարզպետ Սեյրան Պետրոսյանի առանձնասենյակում ընդունեց տարբեր խնդիրներ ու բողոքներ ունեցող քաղաքացիների: Նկատենք սակայն, որ գյումրեցիներից ոչ բոլորն էին տեղյակ արդարադատության նախարարի այցի մասին, այլապես նրան հանդիպելու ցանկություն շատ ավելի մարդ կհայտներ:
Նախարարը ընդունեց 7 քաղաքացու, նրանցից մեծ մասի բողոքը վերաբերում էր բնակարանային խնդրին: Օրինակ` տարեց մի կին բողոքեց, որ իր հայրը, տուն ստանալով Գյումրու նորակառույց Մուշ 2 թաղամասում, չի հասցրել իր բնակարանը սեփականաշնորհել, մահացել է, հիմա կառավարությունը, առանց հաշվի առնելու, որ այդ մարդը ժառանգ ունի, բնակարանը հետ է վերցնում, ժառանգին չի կամենում տալ: Մինչդեռ, ըստ տիկնոջ, ինքը բազմանդամ ընտանիք ունի, սակայն ապրում է տնակի մեջ:
Այս թեման շարունակեց Շիրակի փոխմարզպետ Սեյրան Պետրոսյանը` նշելով, որ նման դեպքերը մեծ թիվ են կազմում Գյումրիում, և սա լուրջ խնդիր է: Փոխմարզպետն ասաց, որ վերջին անգամ շահագործման հանձնված 1506 բնակարանից 6-ը արդեն հետ են վերցրել, քանի որ բնակարան ստացած միայնակ ծերերը մահացել են, նրանց ժառանգներն էլ չեն կարող տեր կանգնել, քանի որ դրանք սեփականաշնորհված չեն:
Արդարադատության նախարարը ուշադրությամբ լսում էր բոլորին, փորձում ինչ-որ կերպ օգնել, իր տեղակալին խնդրում էր գրանցումներ անել, վերցնել նրանց փաստաթղթերը` խնդիրը խորությամբ ուսումնասիրելու համար :
Կարդացեք նաև
Երևանի պետական համալսարանի իրավաբանական կրթություն ստացած մի աղջիկ էլ նախարարին խնդրեց իր գլխավորած համակարգում աշխատանքի տեղավորել իրեն: Նա ասաց, որ աշխատել է Գյումրու հարկային տեսչությունում, Գյումրու քաղաքապետարանում, սակայն այժմ գործազուրկ է:
Մանրամասները` տեսանյութում:
Նունե ԱՐԵՎՇԱՏՅԱՆ
