IOS օպերացիոն համակարգով աշխատող հեռախոսների եւ պլանշետների օգտատերերը արդեն հնարավորություն ունեն նոր «Հայկական Գանձեր» (Armenian Treasures) հավելվածի միջոցով շրջել հայկական պատմամշակութային հուշարձանների տարածքով՝ ինչպես իրական կյանքում: Այս մասին այսօր «Անալիտիկ» կենտրոնում լրագրողների հետ զրույցում հայտնեցին «Հայկական Գանձեր» ինտերակտիվ նախագծի հեղինակները:
Ինչպես ներկայացրեց նախագծի հեղինակ Վլադիմիր Սոֆյանը՝ «Հայկական Գանձեր» ինտերակտիվ նախագիծը իրենից ներկայացնում է վիրտուալ ճանապարհորդությունների շարք դեպի հայկական պատմամշակութային հուշարձանները: Ծրագիրը ներբեռնելով՝ օգտատերերը միանգամից հնարավորություն ունեն հայտնվել եկեղեցու բակում, շրջել այնտեղ, ներս մտնել եկեղեցի, մոմ վառել, աղոթք ասել, երաժշտություն լսել: Նաեւ հնարավոր է կառույցը տեսնել թռիչքի բարձրությունից: Ծրագիրը հասանելի է երեք լեզուներով՝ հայերեն, ռուսերեն, անգլերեն: Ընտրելով լեզուներից մեկը՝ հնարավոր է մանրամասն ծանոթանալ եկեղեցու պատմությունը:
Բանախոսները ներկայացրին, որ ծրագիրը հնարավոր է ներբեռնել՝ Apple-ի App Store խանութում՝ գրելով Armenian Treasures բառերը: Android համակարգով աշխատող սարքերի համար այն հասանելի կլինի մի քանի շաբաթից:
Ծրագիրը անվճար է ներբեռնելու համար, Տաթեւի վանքում շրջելը նույնպես անվճար է, սակայն մնացած եկեղեցիներում հայտնվելու համար պետք է գումար վճարել՝ 4,95 ԱՄՆ դոլար: Բանախոսները ներկայացրին, որ հավելվածում արդեն ներառված են 9 եկեղեցիներ. «Արդեն պատրաստ են Գառնու,Գեղարդի, Ղազանչեցոց վանքի, Գանձասարի, Նորավանքի, Խոր Վիրապի, Սեւանավանքի եւ Կեչառիսի տարածքում շրջելու հավելվածները: Սակայն ի՞նչ նախագիծ՝ առանց Էջմիածնի, Սանահինի եւ Հաղպատի»: Ծրագրի հեղինակները նաեւ պատրաստվում են այն ավելի ընդլայնել, եւ դրա մեջ ներառել ամբողջ աշխարհի, այդ թվում նաեւ Արեւմտյան Հայաստանի բոլոր հայկական եկեղեցիները:
Կարդացեք նաև
Այս նախագծի միջոցով, Էմիլ Ստեփանյանի խոսքով, ցանկանում են պատշաճ կերպով շուկային ներկայացնել Հայաստանի մշակույթը. «Մեր հայկական մշակույթը եւ պատմություն լավ ներկայացված չէ: Մենք ցանկանում ենք, որպեսզի Հայաստանը ճանաչեն որպես թանգարան բաց երկնքի տակ»:
Նախագծի հեղինակ Վլադիմիր Սոֆյանի խոսքով էլ ՝արդեն մոտ 3 հազար հոգի աշխարհի տարբեր ծայրերից ներբեռնել են «Հայկական գանձեր» ծրագիրը. «Մենք բազմամիլիոնանոց սփյուռք ունենք, հայ երիտասարդների նոր սերունդ է մեծանում, որոնք միշտ չէ, որ կարող են Հայաստան գալ: Սա նրանց համար լավ հնարավորություն է ծանոթանալու իրենց նախնիների պատմությանը, մշակույթին, եւ այս կերպ կխթանենք նրանց արագ վերադարձը»:
«Հայկական գանձեր» ծրագիրը նաեւ հասանելի է ձայնասակավառակներով:
Տեսանյութում կարող եք դիտել, թե ինչպես ձայնասակավառակի տուփի վրա պահելով պլանշետի տեսախցիկը՝ հնարավոր է դառնում միանգամից հայտնվել հուշահամալիրի տարածքում:
Էլյա ՀՈՎՀԱՆՆԻՍՅԱՆ
