«Ինչպես գիտենք, Հայաստանը գնում է մի տեղ, որի անդամ երկրները նույնպես չգիտեն, թե ինչ է լինելու, ինչ է սպասվում: ԵՄ-ում` ի տարբերություն ԵՏՄ-ի, չկա պարտավորվածություն, և յուրաքանչյուր երկիր ինքն է որոշում` տեղավորվո՞ւմ է այդ չափանիշների մեջ, թե` ոչ: Եվրամիությունը միշտ դռները բաց է թողնում, ու մենք պետք է որոշենք՝ ինչպե՞ս տեղավորվել այդ չափանիշի մեջ»,- այսօր «Ուրբաթ» մամուլի ակումբում լրագրողների հետ հանդիպման ժամանակ ասաց ՀՀ ԱԺ արտաքին հարաբերությունների հանձնաժողովի նախկին նախագահ, փորձագետ Հովհաննես Իգիթյանը:
Փորձագետը նշեց, որ կառավարության գլխավորությամբ բոլոր նրանք, ովքեր փորձում են դրական բան նկատել ՀՀ-ի՝ ԵՏՄ-ին անդամակցելու մեջ, խոսում են միայն ինչ-ինչ վտանգների հաղթահարման մասին. «Իրենք չեն խոսում Հայաստանի շահերի մասին: Ասում են որ հաղթահարվել է այսինչ կամ այնինչ վտանգը, հաղթահարվել է Լեռնային Ղարաբաղի և Հայաստանի միջև սահմանային անցակետ դնելու հարցը: Մինսկում ստորագրություն դնողներին է պետք հարցնել:
Ձեզ ինչ-որ մի քաղաքական գործիչ կարող է ներկայացնել, որ անդամակցության շնորհիվ Հայաստանի բյուջեն կավելանա քսան միլիոնով, հարյուր միլիոնով, տարբեր թվեր են շրջանառվում…Սա էական չէ: Այս ձևով բյուջեի ավելացումը չի ազդի տնտեսության վրա: Ճիշտ կլինի, եթե ուղղակի հարկերից գան այդ գումարները: Օրինակ, հարյուր միլիոն դոլար ուղղակի հարկերից եկած բյուջեն նշանակում է, որ բյուջեն հարստացավ այդ գումարով, նաև՝ Հայաստանում տնտեսական և սոցիալական աշխուժությունը ավելացել է այնքան, որ, օրինակ, եկամտահարկից, շահութահարկից մենք այդքան գումար ունենք. տնտեսությունն աճել է տասն անգամ: Թե չէ՝ ինքն իրենով հարյուր միլիոնը սոցիալական որևէ հարց չի լուծում: Այս ձևով գումար ստանալը գնալու է միայն ինչ-որ ադմինիստրատիվ ծախսերի»,- ավելացրեց Հովհաննես Իգիթյանը:
Սյունե Սևադա
