«Հեռուստաեթերի մաքրման պահանջ» նախաձեռնությունը հոկտեմբերի 6-ին բաց նամակ է հղել ՀՀ նախագահին, Հանրային խորհրդի նախագահին և Հեռուստատեսության ու ռադիոյի ազգային հանձնաժողովի (ՀՌԱՀ) նախագահին:
Առիթը «Հ2» հեռուստաընկերությամբ եթեր հեռարձակվող «Glendale Life show» հաղորդումն է, որում, ըստ «Հեռուստաեթերի մաքրման պահանջ» նախաձեռնության անդամներ Պավել Սարգսյանի և Տիգրան Մարտիրոսյանի, մի շարք խախտումներ կան՝ սկսած ցուցադրման ժամից մինչև գործածվող լեզուն. «Այս հաղորդումը չի կարելի կեսգիշերից շուտ ցուցադրել, մինչդեռ այն ցուցադրվում է 22:10-ին: Եվ մենք նամակով պահանջում ենք, որ կանխվի «Glendale Life show»-ի ցուցադրությունն այդ ժամին»,- այսօր լրագրողների հետ հանդիպման ժամանակ ասաց նախաձեռնության անդամ Տիգրան Մարտիրոսյանը:
«Ըստ ձեզ՝ այդ հաղորդումը էրոտի՞կ է»,- հարցրեց «Հ2» հեռուստաընկերության լրագրողը:
«Այո, էրոտիկ է»,- պատասխանեց Տ. Մարտիրոսյանը:
Կարդացեք նաև
«Իսկ ինձ համար էրոտիկ չէ»,- եղավ լրագրողի պատասխանը:
«Հեռուստաընկերությունները հիմնականում առաջնորդվում են վարկանիշ (ռեյտինգ) ասվածով: Եվ դա բնական է,- ասաց Տ. Մարտիրոսյանը,- նրանք իրենց շահույթի համար այդ վարկանիշը պիտի ապահովեն, բայց մեր կարծիքով այդ ռեյտինգը չպետք է լինի հասարակության բարոյազրկման հաշվին: Այսինքն՝ պետք է սահմանված չափորոշիչներ լինեն, որոնք դեռ չկան, եղածներն էլ հստակ չեն»:
«Հեռուստաեթերի մաքրման պահանջ» նախաձեռնության անդամները վերջին շրջանում դրական տեղաշարժեր էլ են նկատում. «Օրինակ՝ «Հ1»-ն արդեն ունի լավ հաղորդումներ: Մեկ տարի առաջ այն լրիվ այլ հեռուստաալիք էր,- Aravot.am-ի հետ զրույցում ասաց Տ. Մարտիրոսյանը,- նախորդ տարի, երբ առաջին անգամ դիտեցի «Հայադարան» հաղորդաշարը, այն ինձ համար իսկապես բացահայտում էր, շատ տպավորված էի: Դրանից հետո լավ հաղորդումները շատացան, ինչպես, օրինակ, Ցվետաննա Պասկալևայի «Նվիրյալներ» հաղորդաշարը: Ճիշտ է, լավ չէ, որ ռուսերեն է. ցավոք, Պասկալևան էլ հայերենի խնդիր ունի, բայց իմ կարծիքով արժե, որ հենց նա վարի այդ հաղորդումը»:
Մեր զրուցակցի դիտարկմամբ, «Հ1»-ից բացի, մշակութային բավականին լավ հաղորդումներ ունեն նաև «Ար»-ը և «Երկիր մեդիան». «Մյուս հեռուստաընկերություններն էլ են, կարծես թե, սկսել այդ սկզբունքով առաջնորդվել»,- հավելեց նա:
Ըստ Տ. Մարտիրոսյանի՝ հեռուստատեսությունը հիմա ամենաշատը մանկական հաղորդումների պակաս ունի. «Ժամանակին «Հայրենիք» հեռուստաալիքը լրացնում էր այդ բացը և շատ լավ էր լրացնում: Հիմա այդ բացն զգալի է»,- ասաց նա:
Մեր զրուցակցի կարծիքով հեռուստաեթերն ուղղակի հագեցած է շոուներով ու սերիալներով. «Չափից շատ են շոուները: Ճիշտ է, մարդկանց դա գրավում է, բայց ամեն գրավիչ բան չէ, որ պիտի անընդհատ մատուցես ու մատուցես,- համոզված է Տ. Մարտիրոսյանը,- իսկ սերիալները, անիմաստ լինելուց բացի, նաև բացասական ազդեցություն ունեն: Եթե գոնե չեզոք լինեին, չէինք բողոքի: Չեմ ասում՝ սերիալներ մի նկարեք, բայց կարելի է, չէ՞, որակով սերիալներ նկարել»:
Սիրանուշ ՀԱՅՐԱՊԵՏՅԱՆ
