Հայրենական ապրանքների արտադրության միության գործադիր տնօրեն Գեղամ Գալստյանը հիացած է ԵՏՄ-ին անդամակցելու Հայաստանի իշխանությունների որոշմամբ: Այդ որոշումն էլ համարում է Հայաստանի վերջին 24 տարվա ընթացքում միակ խելացի քայլը:
«Իսկական Հայաստանի համար բացվում է 170 միլիոնանոց հսկայական շուկա, հայ մարդը կարող է աշխատել, ստեղծագործել»,- այսօր Երևանում Եվրասիական տնտեսական միությանը՝ Հայաստանի անդամակցության թեմայով քննարկման ժամանակ ասաց պարոն Գալստյանը:
Մեկ այլ քաղաքացի էլ բարձրացրեց արտագաղթի վերաբերյալ իր մտահոգությունները` ի՞նչ կլինի Եվրասիական տնտեսական միությանն անդամակցելուց հետո. «Արտագաղթը կապված է աշխատատեղերի բացակայության հետ, դուք ասացիք, որ ընդունված փաստաթղթերում մեծ ուշադրություն կդարձվի երկրի արտադրական ուժերի զարգացման ու արդիականացման խնդիրների վրա: Ինձ հետաքրքրում է `կոնկրետ ի՞նչ է նշված: Եթե ոչ Նաիրիտի վերագործարկման, ապա այլ` կաբելի, լամպերի գործարանների հետ կապված ի՞նչ ծրագրեր կան: Դրանք կարող են աշխատատեղեր ապահովել: Այդ ուղղությամբ աշխատանքներ տարվո՞ւմ են»:
Նա նաեւ դիմեց նախագահ Սերժ Սարգսյանի խորհրդական Կարինե Մինասյանին, ասաց, որ խորհրդային տարիների վաստակավոր գյուտարար է ու սրտնեղեց, որ իրավաբանները ստանում են 600.000 դրամ թոշակ, իսկ ինքը` 55.000 դրամ:
Կարդացեք նաև
Հարցին ու դիտարկմանը անդրադարձավ դեմոկրատական կուսակցության նախագահ Արամ Սարգսյանը. «Չեմ ուզում հեռանալ այդ հարցի պատասխանի պատասխանատվությունից, բայց Հայաստանի առջեւ այնպիսի հնարավորություններ են բացվում, որոնք պետք է ճիշտ օգտագործել: Այսինքն, մեր փոխարեն ոչ ոք չի անելու այն, ինչ պետք է անենք: Եթե մենք փորձենք նոր կարգ ու կանոն հաստատել, որովհետեւ մտնում ենք նոր միության մեջ, որը շատ մեծ քաղաքական նշանակություն ունի, ապա այդ պարագայում Հայաստանը լուրջ հնարավորություններ կարող է ձեռք բերել: Եթե նստենք ու սպասենք, որ քեռին գալու է մեր փոխարեն ամեն ինչ անի, չի լինելու դա, որեւէ փոփոխություն չի լինի: բոլորս ուզում ենք ռեալ բարեփոխումներ երկրում»:
Արփինե ՍԻՄՈՆՅԱՆ
