Այսօր Ռուսաստանի հայերի միության նախաձեռնությամբ Երևանում Եվրասիական տնտեսական միությանը՝ Հայաստանի անդամակցության թեմայով քննարկում էր կազմակերպվել:
Տնտեսագետ Թաթուլ Մանասերյանը հակված չէ մտածել, թե ԵՏՄ-ն Հայաստանի համար հետընթաց է. «Ընդհանրապես ծայրահեղական կարծիքները ընդունելի չեն` ոչ ուլտրաարևմտամետների, ոչ ուլտրաարևելամետների»:
Ըստ նրա, անդամակցությունից հետո Հայաստանը պետք է հաշվի նստի սպասվող սպառնալիքների հետ՝աշխատատեղերի կրճատում, արտագաղթի ահագնացում. «Այս պահին այլընտրանք չկա: Տարածաշրջանային միավորումները լավագույն ձևերից են համախմբելու ուժերը, համատեղ ջանքերով լուծելու այն խնդիրները, որոնք մեկուսի հնարավոր չէ լուծել»:
Տնտեսագետի խոսքով, Հայաստանը չի կարող մեկուսացած լինել գլոբալ գործընթացներից, հատկապես բավական մեծ նպատակներ ունեցող տարածաշրջանային միավորումից. «ԵՏՄ-ն չի կարող լինել միջին կարգի կամ պարտադրված տնտեսական միությունը, այն պետք է վերածվի համաշխարհային տնտեսական ուժի կենտրոններից մեկի, ինչպես, օրինակ, Չինաստանը վերջին տարիներին ցույց տվեց իր ուժը և այժմ տնտեսական ցուցանիշներով առաջ է անցել բազմաթիվ զարգացած երկրներից:
Կարդացեք նաև
Հայաստանը կարող է լիդերի դեր ստանձնել ԵՏՄ-ում, ինստիտուցիոնալ բարեփոխումների ասպարեզում»:
Թաթուլ Մանասերյանը նկատեց, որ ԵՏՄ-ն մեծ շուկայի հնարավորություն է ընձեռում Հայաստանին. «Մեզ համար ԵՏՄ անդամակցությունը լուրջ մարտահրավեր է, փորձել ի մի բերել մեր ազգային մրցունակ առավելությունները և դրանք իրացնել ԵՏՄ-ում, ինչպես նաև ավելի լայն մասշտաբով դիվերսիֆիկացնել մեր կապերը աշխարհի հետ»:
Ինչ վերաբերում է ԵՏՄ, թե ԵՄ ընտրությանը, ապա տնտեսագետը դրա հանգուցալուծումն է տեսնում. « Թե Բրյուսելից, թե Մոսկվայից հնչում են բանակցելու կոչեր և այս պարագայում Հայաստանը կարող է հայտնվել շահեկան վիճակում` օգտվելով թե ԵՄ, թե ԵՏՄ շուկաներից»:
Արփինե ՍԻՄՈՆՅԱՆ
