Այսօր ՀՀ Վարչական դատարանում Էլեկտրաէներգիայի սակագնի թանկացման դեմ պայքարող ակտիվիստ Վահան Դուրինյանի դեմ ՀՀ ոստիկանության հայցի քննությունը տևեց ընդամենը 10 րոպե: Վահան Դուրինյանը մեղադրվում է հունիսի 23-ին էլեկտրաէներգիայի սակագնի բարձրացման դեմ բողոքի ակցիայի ժամանակ ոստիկանի օրինական պահանջը չկատարելու մեջ:
Պատասխանող կողմը հանդես եկավ այս առնչությամբ հակընդդեմ հայցով: Այս հիմքով էլ նախագահող դատավոր Ռոբերտ Սարգսյանը որոշում կայացրեց հետաձգել դատը: Հաջորդ նիստը տեղի կունենա նոյեմբերի 6-ին, ժամը 11.00-ին:
Aravot.am-ի հետ զրույցում Վահան Դուրինյանը պատմեց, որ իրենք խաղաղ ակցիա էին անցկացնում, և ինքը բերման է ենթարկվել «շատ անհասկանալի պատճառներով, փաստացի հանձնաժողովի դռանը մոտենալու համար»: Վահան Դուրինյանի համար նաև անհասկանալի է, թե ինչու են այդ օրը բերման ենթարկվել ևս 27 հոգի:
Մեր դիտարկմանը` քաղաքացիական ակտիվիստների դեմ տուգանքներով, դատական գործերով, փորձում են ճնշե՞լ հասարակական ակտիվությունը, Վահան Դուրինյանն արձագանքեց. «Թե ինչ-որ մեկը մտածում է, որ եթե գործը հասել է դատարան, թեկուզ վարչական տուգանք է սահմանվում, այդպիսով հնարավոր է ճնշում գործադրել, ապա վստահեցնում եմ, որ մեր բոլոր ընկերների համար դա նշանակություն չունի: Ավելին, ՀՀ ոստիկանության դեմ խմբակային հայց է ներկայացվել` մարմնական վնաս ստացած ակտիվիստների կողմից` մոտ 10-12 հոգի: Այդ թվում են Հայկ Ավետիսյանը, Վարդան Զեյնալյան, Արա Կարագոզյանը և այլք»:
Տաթև ՀԱՐՈՒԹՅՈՒՆՅԱՆ
