Հոկտեմբերի 15-ին Երևանի ավագանու «Բարև Երևան» խմբակցությունը հանդես է եկել «ԵՐԵՎԱՆ ՔԱՂԱՔԻ ԱՎԱԳԱՆՈՒ 2009 ԹՎԱԿԱՆԻ ՀՈՒՆԻՍԻ 18-Ի N 1-Ն ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» որոշման նախագծի առաջարկով, որի նպատակն է առցանց ուղիղ եթերով հեռարձակել Երևանի ավագանու նիստերը:
Այն շարունակությունն է Երևան քաղաքի ավագանու 2009 թվականի հունիսի 18-ի «Երևան քաղաքի ավագանու կանոնակարգը ընդունելու մասին» N 1-Ն որոշման 108-րդ կետի` «Ավագանու նիստը հրապարակային է:»
Սույն նախագիծը հիմնավորվել է Երևանի ավագանու 30.04.2014թ-ի N 154-Ն «ԵՐԵՎԱՆ ՀԱՄԱՅՆՔՈՒՄ ՏԵՂԱԿԱՆ ԻՆՔՆԱԿԱՌԱՎԱՐՄԱՆԸ ԲՆԱԿԻՉՆԵՐԻ ՄԱՍՆԱԿՑՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ» որոշմամբ, որով Երևանի ավագանին միաձայն պարտավորություն է ստանձնել ապահովել Երևանի ավագանու գործունեության թափանցիկությունն ու հրապարակայնությունը:
Վերոնշյալ որոշման 1-ին գլխի 2-րդ կետն ասում է, որ սույն կարգի իրականացման նպատակն է համայնքի բնակիչների համար համայնքի կառավարմանը, համայնքի քաղաքականության մշակման և որոշումների կայացման գործընթացներում մասնակցելու հնարավորության, ինչպես նաև հանրային տեղեկատվության լիակատար մատչելիության, համայնքի տարածքում գործող կանոնների և պարտականությունների իմացության ապահովումը բարձր տեխնոլոգիաների կիրառման միջոցով:
Նույն որոշման 9-րդ կետով ամրագրված են Երևանի քաղաքապետի կողմից Համայնքում տեղական ինքնակառավարմանը բնակիչների մասնակցությունը ապահովող հետևյալ լիազորությունները` ապահովում է բնակիչների տեղեկատվության ստացման հնարավորությունը, կազմակերպում է համայնքի հանդեպ ունեցած կամ այլ պարտավորությունների վերաբերյալ բնակիչներին պատշաճ կարգով իրազեկումը:
Երևանի ավագանու «Բարև Երևան» խմբակցությունը վստահ է, որ Երևանի ավագանու նիստերի առցանց հեռարձակումը կնպաստի Երևանի ավագանու 30.04.2014թ-ի N 154-Ն «ԵՐԵՎԱՆ ՀԱՄԱՅՆՔՈՒՄ ՏԵՂԱԿԱՆ ԻՆՔՆԱԿԱՌԱՎԱՐՄԱՆԸ ԲՆԱԿԻՉՆԵՐԻ ՄԱՍՆԱԿՑՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ» որոշումն ավելի արդյունավետ իրականացնելուն, ինչպես նաև այսուհետ կբացառի քաղաքապետարանի կողմից «Ինֆորմացիայի ազատության կենտրոնի» սահմանած «Ժանգոտ կողպեք» անպատվաբեր մրցանակ ստանալը:
Հարգանքներով՝
Անահիտ Բախշյան
Երևանի ավագանու «Բարև Երևան»
խմբակցության ղեկավար
