Այսօր հրաձգության ֆեդերացիայում հրավիրված մամուլի ասուլիսում Հայաստանի հրաձգության ֆեդերացիայի գլխավոր քարտուղար Արեգ Սարիբեկյանը եւ Հայաստանի հրաձգության հավաքականի ավագ մարզիչ Սեյրան Նիկողոսյանը խոսեցին մեզ համար կիրառական եւ կենսական նշանակություն ունեցող հրաձգային սպորտում վերջին տարիներին արձանագրված հաջողությունների եւ նվաճումների, ինչպես նաեւ չլուծված խնդիրների եւ անելիքների մասին:
Բանախոսները նշեցին, որ թեեւ հատկապես մեր պատանի ու երիտասարդ հրաձիգները արդեն սկսել են արդյունքներ ցույց տալ եւ մեդալներ նվաճել իրենց տարիքային խմբերի Եվրոպայի, աշխարհի առաջնություններում, իսկ բոլորովին վերջերս նաեւ` պատանեկան օլիմպիական խաղերում, սակայն ցուցանիշներն անհամեմատ ավելի ներշնչող կլինեին եւ կարող են դառնալ, եթե ֆեդերացիան բավարար միջոցներ ունենա զենք-զինամթերք ձեռքբերելու համար եւ մեր հրաձիգները ավելի շատ միջազգային մրցումների մասնակցելու հնարավորություն ունենան:
Սեյրան Նիկողոսյանի խոսքերով, հենց մրցափորձի պակասն է խանգարում մեր մարզիկներին` ավելի հաջող հանդես գալու համար:
Արեգ Սարիբեկյանն էլ նշելով, որ հրաձգության հայկական դպրոցը դեռեւս Խորհրդային Միության ժամանակներից միշտ էլ շատ բարձր մակարդակ եւ ավանդույթներ է ունեցել, անկում ապրեց 90-ական թվականներին: «Սակայն հիմա սպորտը, այդ թվում նաեւ հրաձգությունը, զարգանում է եւ ընդհանուր ջանքեր են պահանջվում այսուհետեւ միայն առաջ ընթանալու համար: Պետք է աշխատենք հրաձգությունը զարգացնելու ուղղությամբ, որովհետեւ այն մեզ համար շատ անհրաժեշտ ու ռազմավարական նշանակություն ունեցող մարզաձեւ է», – ասաց պարոն Սարիբեկյանը:
Կարդացեք նաև
Աշոտ ՀԱԿՈԲՅԱՆ
