Ինչպես տեղեկացրել ենք, սեպտեմբերի 28-ին Սևանա լճից ջրաբացթողման հետևանքով տուժել են Հրազդանի Ջրառատ թաղամասի մի քանի տներ: Քաղաքապետի տեղակալ Գեղամ Տիգրանյանի հաղորդմամբ՝ դրանց թիվը 13-ն է: Նրա խոսքով՝ դեպքը հետաքննող հանձնաժողովը ՀՀ կառավարությանն առընթեր ջրային տնտեսության պետական կոմիտեի ներկայացուցչի հետ համատեղ կազմել է վերջնական հաշվետվություն: «Ամեն ինչ քննարկվել է. քաղաքաշինական խնդիր չկա, միայն՝ գյուղատնտեսական: Որոշել ենք փոխհատուցել յուրաքանչյուրին իր կրած վնասի չափով», -ասաց պարոն Տիգրանյանը:
Նա հավելեց, որ եզրակացությունը հաղորդվել է Կոտայքի մարզպետարանին, որն էլ, իր հերթին, պիտի խնդիրը ներկայացնի ՀՀ կառավարության քննարկմանը: Այն հարցին, թե ո՞րն է փոխհատուցման ուշացման պատճառը, մեր զրուցակիցը պատասխանեց. «Ոչինչ միանգամից չի լինում: Ամեն ինչ պետք է բերել փաստաթղթային տեսքի»: Բանախոսը խոստացավ ստույգ պատասխան տալ հաջորդ երեքշաբթի:
Ինչ վերաբերում է ջրառատցիներին, վերջիններս չեն հավատում, որ որևէ բան կփոխվի: Բնակիչներից մեկի խոսքով՝ հանձնաժողովը հրաժարվել է գնահատել ջրախեղդ եղած կենդանիների ու կաղամբի բերքի վնասը՝ պատճառաբանելով, որ փոխհատուցում տրվելու է միայն կարտոֆիլի համար:
Լուսանկարը՝ Հրազդանի քաղաքապետարանի պաշտոնական կայքէջից
Կարդացեք նաև
Անի Անտոնյան
