Հեղինակը զերծ է մնացել սուբյեկտիվ մեկնաբանություններից
«Սա կարեւոր գիրք է»,- այսօր` հոկտեմբերի 15-ին, «Մոդուս վիվենդի» կենտրոնում Վլադիմիր Հարությունյանի «1918 հայ-վրացական պատերազմը» գրքի շնորհանդեսի ընթացքում այսպես բնութագրեց գիրքը «Մոդուս Վիվենդի» կենտրոնի ղեկավար Արա Պապյանը:
Գրքում Վլադիմիր Հարությունյանը ներկայացրել է 1918 թվականի դեկտեմբերին հայ-վրացական պատերազմին առնչվող արխիվային փաստաթղթերը:
Կարդացեք նաև
Արա Պապյանը նշեց, որ իրենք շատ են կարեւորում սկզբնաղբյուրները, այդ իսկ պատճառով գրքում ներկայացված են փաստաթղթերի լուսապատճենները եւ նրանց հայերեն թարգմանությունները. «Ցավոք սրտի, մեր պատմագիտությունը ավելի շատ Խորենացու պես է, որ լսել են նման բաներ են պատմում, այդպիսով` ամեն մարդ իր ուզածը պատմում է եւ շատ հաճախ գաղափարախոսական տեսանկյունով»:
Վլադիմիր Հարությունյանը նշեց, որ գրքում ներկայացված են փաստաթղթեր, որ տառաճանաչ ընթերցողը ի վիճակի է ընկալել եւ համապատասխան եզրակացություններ կատարել: Նա հավելեց, որ ներկայացրել է ոչ միայն այդ պատերազմին վերաբերող փաստաթղթեր.
«Սա փաստաթղթերի ժողովածու է եւ համապատասխանում է այն հոգեբանությանը եւ գործելաոճին, որը որդեգրել է «Մոդուս վիվենդի» կենտրոնը: Մենք զերծ ենք մնացել սեփական սուբյեկտիվ մեկնաբանություններից եւ ցանկացել ենք, որպեսզի ինչ որ մեկի կարծիքը չգերիշխի»:
Ամի ՉԻՉԱԿՅԱՆ
