Ամբաստանյալ Սամվել Դավթյանի եւ Արտուշ Հակոբյանի պաշտպաններ Կարեն Հակոբյանն ու Հովիկ Արսենյանն այսօր հանդես եկան միջնորդությամբ՝ կրկնակի մատնադրոշմային եւ դատաքիմիական համալիր փորձաքննություն նշանակելու վերաբերյալ:
Պաշտպան Կարեն Հակոբյանը հիշեցրեց, որ պաշտպանական կողմի միջնորդությամբ նախորդ նիստերից մեկում հարցաքննվել էր թիվ 1928 եզրակացությունը տված ՀՀ ոստիկանության ավագ փորձագետ Արտակ Մինասյանը, որը հայտնել էր, թե փորձաքննության ներկայացված զենքի, փամփուշտների, գազային ատրճանակի, կպչուն ժապավենների վրայից անձամբ առգրավել է մի շարք ձեռքի հետքեր, այդ թվում՝ նույնացման համար ոչ պիտանի:
Ըստ պաշտպանի՝ իրենց հարցերին, թե ինչո՞ւ եզրակացության մեջ բացակայում են այդ մասին նշումները, ինչպես նաեւ ինչո՞ւ չեն նշվել, թե ինչպիսի քրեագիտական փոշիներ, ինչ տեսակի, մոդելի քրեագիտական վրձիններ, գործիքներ են օգտագործվել, ինչ եղանակով են հայտնաբերվել ձեռքի հետքերը, ինչ մեթոդով, փորձագետը պատասխանել էր, որ մուգ գույնի օբյեկտների վրայից հետքերն առգրավվել են արծաթագույն քրեագիտական փոշիով, իսկ բաց գույնի օբյեկտների վրայից՝ բաց գույնի քրեագիտական փոշիով: Մինչդեռ եզրակացությանը կցված մատնահետքերի լուսանկարներում պատկերված են հատկանիշները:
Կարդացեք նաև
Դատարանում կրկնակի համալիր փորձաքննությունն անցկացնելու անհրաժեշտության մասին հիմնավորումներ արեց նաեւ Արտուշ Հակոբյանի պաշտպանը: Դատավորը մտել է խորհրդակցական սենյակ՝ միջնորդության հետ կապված:
Մանրամասները՝ առաջիկայում:
Ռուզան ՄԻՆԱՍՅԱՆ
