Ադրբեջանի նախագահ Իլհամ Ալիևը ԵԱՀԿ Մինսկի խմբի համանախագահների հետ հանդիպման ժամանակ բարձրացրել է Ղարաբաղում ձերբակալված ադրբեջանցի դիվերսանտների հարցը, հայտնել է Ադրբեջանի արտաքին գործերի նախարար Էլմար Մամեդյարովը, փոխանցում է «ԱՊԱ»-ն:
Համանախագահները հոկտեմբերի 14-18-ը կգտնվեն տարածաշրջանում, այցի հիմնական նպատակն է Ֆրանսիայում Հայաստանի և Ադրբեջանի նախագահների հանդիպման նախապատրաստությունը:
«ԵԱՀԿ Մինսկի խմբի համանախագահների հետ հանդիպման ժամանակ Իլհամ Ալիևը նրանցից պահանջել է Հայաստանի առաջ բարձրացնել Դիլգամ Ասքերովին և Շահբազ Գուլիևին շուտափույթ ազատ արձակելու հարցը», – ասել է Մամեդյարովը հոկտեմբերի 15-ին ճեպազրույցի ժամանակ, – «Այս պահին այդ հարցով Կարմիր Խաչն է զբաղվում: Մենք պահպանում ենք նրանց հետ կապն ու հույս ունենք, որ մոտակա ժամանակում դրական արդյունքի կհասնենք»:
Երեք հոգուց բաղկացած ադրբեջանական դիվերսիոն խումբը հայտնաբերվել և վնասազերծվել էր 2014թ. հուլիսի 11-ին Քարվաճառում, խմբի երրորդ անդամը՝ Հասան Հասանովը սպանվել էր: Նրա դին վերադարձվել է Ադրբեջանին:
Կարդացեք նաև
Պատրաստեց Հովհաննես ԻՇԽԱՆՅԱՆԸ
