Ինչպես արդեն տեղեկացրել ենք այսօր Կենտրոն և Նորք- Մարաշ վարչական շրջանների ընդհանուր իրավասության դատարանում շարունակվում է «Շանթ և ընկերներ» գործով դատական նիստը (նախագահող դատավոր Մնացական Մարտիրոսյան): Պաշտպանական ճառերով շարունակում են հանդես գալ ամբաստանյալները:
Արմեն Հովհաննիսյանը դատարանի դահլիճում հայտարարեց. «Ես կամակատար դատախազին բան չունեմ ասելու: Ինչքա՞ն անբարոյական պետք ա լինի մարդ, որ Շահեն Հարությունյանի համար վեց տարվա ազատազրկում պահանջի: Դուք բոլորդ հոգեբույժի լուրջ միջամտության կարիք ունեք: Դուք ոչ միայն թալանում եք մեր ժողովրդին, այլև վաճառում եք ազգին: Եթե ես իրականում հանցագործություն գործած լինեի, ինձ համար ամոթալի չէր լինի պատիժ կրելը, բայց դուք առանց ապացույցների ինձ համար պահանջում եք չորս տարվա ազատազրկում: Բռնություն չգործադրեիք, ես էլ չէի պաշտպանվի: Անգամ ինձ ազատազրկման դատապարտելով` Դուք վախենում եք հենց ինձնից»:
Այնուհետև նշեց, թե «Դուք գործել եք Հայաստանի Երրորդ Հանրապետության մեջ ամենամեծ դավաճանությունը` ստորագրելով Մաքսային Միությունը: Պառկելով ռսի տակ` Դուք վաճառեցիք երկիրը: Ես մասնակցել եմ արժեքների հեղափոխության համար, քանի որ մեր երկիրը կործանման է գնում: Ես մայոր Արմեն Հովհաննիսյանն եմ, Երկրապահ կամավորականի անդամ, զինված ուժերում քսան տարի մեդալներով: Ես քաղբանտարկյալ եմ, հալածվում եմ իշխանության կողմից` հայրենանվեր քայլիս համար: Ոչ մի կուսակցություն թող իրեն իրավունք չտա ընդդիմություն անվանելու, միայն մի ընդդիմություն կա, ու նստածա ստեղ` ամբաստանյալի աթոռին: Ես դիմում եմ բոլորին` եթե իմ կամ ընտանիքիս անդամների նկատմամբ որևէ բան կատարվի, իմացեք, որ դա իշխանության պատվերն է` վրեժխնդրությունից ելնելով»:
Դատավորին հիշեցրեց, թե «առանց դատավճռի ԱՄՆ-ում ՀՀ նախագահ Սերժ Սարգսյանը մեզ անվանեց հանցագործներ» և միջնորդեց նրան հրավիրել դատարան` վկայություն տալու»:
Կարդացեք նաև
Շանթ Հարությունյանի որդի Շահեն Հարությունյանը ևս ելույթ ունեցավ. «Այո, խփել եմ ոստիկանին, ու չեմ զղջում դրա համար: Իսկ եթե կրկնվի, նորից կխփեմ: Ես շարունակելու եմ իմ ազգի պայքարը, որը սկսվել է դեռևս հորս պապից»:
Տաթև ՀԱՐՈՒԹՅՈՒՆՅԱՆ
