«Ես երեկ գրություն եմ ստացել, որ Գալուստ Սահակյանն արգելել է, որ «Խորհրդարանական ժամ» հաղորդման ժամանակ երեք րոպե տեսակետների հեռարձակման ժամանակ իմ տեսաձայնագրված հայտարարությունը եթեր գնա Հանրայինի եթերով»,-այսօր «Հայացք» ակումբում լրագրողների հետ հանդիպմանը հայտարարեց «Ժառանգություն» խմբակցության պատգամավոր Զարուհի Փոստանջյանը:
Նա նշեց, որ կրկին դիմելու է համապատասխան մարմիններին՝ որպես Գալուստ Սահակյանի կողմից պաշտոնական դիրքի չարաշահում: Այնուհետև հավելեց. «Գալուստ Սահակյանը կոնկրետ քաղաքական ուժի տեսակետի նկատմամբ իրականացնում է քաղաքական հետապնդում»:
Այժմ տիկին Փոստանջյանը սպասում է, թե երբ են ընդունելու գործը վարույթ, քանի որ նա Գալուստ Սահակյանի դեմ հայց էր ներկայացրել դատարան. պատգամավորը կարծում է, որ Ազգային ժողովը պետք է Սուրիկ Խաչատրյանի նշանակումը դատապարտող հայտարարություն ընդունի, նա նաեւ հայտարարության նախագիծն է պատրաստել, սակայն Գալուստ Սահակյանը նախագիծը չի ստորագրել՝ թույլ չտալով, որ այն դրվի շրջանառության մեջ, քննարկվի հանձնաժողովներում, իսկ վերջում՝ լիագումար նիստում:
Տաթև ՀԱՐՈՒԹՅՈՒՆՅԱՆ
Կարդացեք նաև
Հ. Գ. Ներկայացնում ենք Զարուհի Փոստանջյանի այն հայտարարությունը, որը նա պատրաստվում էր հնչեցնել «Խորհրդարանական շաբաթ» հաղորդման շրջանակում
«Դատավճիռ հանուն հայ ժողովրդի և ազատ, անկախ ու միացյալ Հայաստանի
10 հոկտեմբերի 2014թ., Երևան: Հայ ժողովրդի դատարանը 2014 թվականի հոկտեմբերի 10-ին դռնբաց դատական նիստում՝ դատարանում (նստավայրը՝ Երևան, Ազատության հրապարակ), քննեց քրեական գործն՝ ըստ մեղադրանքի Սերժ Ազատի Սարգսյանի՝ ծնված 30-ը հունիսի 1954 թվական, Ստեփանակերտ քաղաքում, ազգությամբ հայ, Հայաստանի Հանրապետության քաղաքացի, բարձրագույն կրթությամբ, ամուսնացած, նախկինում չդատված, աշխատել է Հայաստանի Հանրապետության նախագահ, բնակվել է Երևան, Բաղրամյան 26 պալատում։
Մեղադրվում է պետական դավաճանության, իշխանությունը յուրացնելու, հայ ժողովրդին պատկանող շուրջ 42 000 քառակուսի կիլոմետր տարածքային ամբողջականությունը խախտելուն ուղղված գործողություններ կատարելու մեջ։
Սերժ Ազատի Սարգսյանի նկատմամբ քրեական գործը հարուցվել է 2008 թվականի մարտի 1-ին՝ հայ ժողովրդի ազգային անվտանգության ծառայության քննչական վարչության կողմից:
Սերժ Ազատի Սարգսյանի նկատմամբ հարուցված մեղադրանքի էությունը հետևյալն է.
Նա ղեկավարել է 2008 և 2013 թվականների Հայաստանի Հանրապետության նախագահի ընտրություններում ընտրողների ձայները հափշտակելու համար մասնագիտացված կազմակերպված խումբը։
2008 թվականի փետրվարի 19-ին և 2013 թվականի փետրվարի 18-ին տեղեկանալով, որ Հայաստանի Հանրապետության նախագահական ընտրություններում հաղթել է հայ ժողովուրդը՝ իրականացրել է հայ ժողովրդի ձայների հափշտակություն։ Հայաստանի Հանրապետության տարածքում դիմելով կեղծիքի, սպառնալիքի, սպանությունների, մարդկանց առևանգման, ապօրինի ազատազրկման՝ նա բռնազավթել է հայ ժողովրդին պատկանող իշխանությունը, բռնազավթած իշխանությունը պահելու համար նա մատուցել է ծառայություններ այլ պետություններին, ինչն էլ իր հերթին հանգեցրել է պետական դավաճանության:
Բանականության և արդարամտության սկզբունքների վրա հիմնված հասարակության անդամները, Սերժ Ազատի Սարգսյանի և նրա խմբի անդամների կողմից ենթարկվելով բռնաճնշման և հետապնդման, կամ հայտնվել են բանտախցում, կամ դիմել են արտագաղթի, կամ էլ սպանվել են:
Իսկ նրանց կողմից տարիներ շարունակ տարվող քաղաքականությունը խաթարել է հայ ժողովրդի միասնական ճակատագրի գաղափարը կրող և զգացողությունը կիսող հասարակության անդամների համերաշխությունը:
Հանուն հայ ժողովրդի և ազատ, անկախ ու միացյալ Հայաստանի
Հայ ժողովրդի դատարանը վճռեց
Սերժ Ազատի Սարգսյանին դատապարտել ցմահ ազատազրկման,
Սերժ Ազատի Սարգսյանից բռնագանձել հայ ժողովրդից հափշտակված գույքը,
Սերժ Ազատի Սարգսյանի նկատմամբ պատժի կրումը նշանակել «Վարդաշեն» քրեակատարողական հիմնարկում:
Դատավճիռը մտնում է օրինական ուժի մեջ հայ ժողովրդի կամքով»:
