«Այս ամենն ազդում է ընտանիքի վրա. Դավիթը կին ունի, երեխա»,-Aravot.am-ի հետ զրույցում ՀՀ վարչական դատարանի նախասրահում այսպիսի մտահոգություն հայտնեց «Դ!եմ եմ» նախաձեռնության կազմակերպած բողոքի ակցիայի մասնակից, մարտ ամսին ֆինանսների նախարարության շենքի մոտից բերման ենթարկված ծրագրավորող Դավիթ Աղաբեկյանի մայրը:
Այսօր ՀՀ վարչական դատարանում հետաձգվեց Դավիթի դեմ ՀՀ ոստիկանության կողմից ներկայացված դատական գործով նիստը` հայցվոր կողմի բացակայության պատճառով: Հաջորդ նիստը նշանակվեց նոյեմբերի 26-ին, ժամը 11.00-ին:
Հիշեցնենք, որ Դավիթ Աղաբեկյանի դեմ գործ է հարուցվել ՀՀ ոստիկանության ծառայողի օրինական պահանջը չկատարելու համար` Վարչական իրավախախտումների վերաբերյալ ՀՀ օրենսգրքի 182-րդ հոդվածի համաձայն վարչական պատասխանատվության ենթարկելու պահանջով:
Դավիթի մայրը մինչև այժմ չի հասկանում, թե ինչու ոստիկաններն այդպես վարվեցին իր որդու հետ ու նշում է. «Ոչ գոռացել է, ոչ հայհոյել: Նույնիսկ մի անգամ էլ ես եմ գնացել իրենց հետ Ազատության հրապարակ»: Դավիթի ծնողները կարծում են, որ դատարանը արդար որոշում կկայացնի` մանավանդ, որ ըստ նրանց`իրենց որդին այն հավաքին, որ մասնակցել է, «տեղին է կազմակերպված եղել»:
Կարդացեք նաև
Դավիթի ընկերը` Նարեկը, մեզ հետ զրույցում ասաց, «Ես զանգեցի Դավիթին, ասաց, որ մեքենայի մեջ է` դեպի ոստիկանության բաժանմունք ճանապարհին: Բայց ամենահանգիստը Դավիթի համար էինք, նա սովորաբար կենտրոնում չէր լինում»:
Տաթև ՀԱՐՈՒԹՅՈՒՆՅԱՆ
