Օրեր առաջ Հայաստանի պետական տնտեսագիտական համալսարանի (ՀՊՏՀ) հայոց լեզվի դասախոս, երկար տարիներ ամբիոնի վարիչի պաշտոնը զբաղեցրած Մարի Զաքարյանի հետ կապված հերթական միջադեպն է տեղի ունեցել: Նա բանավեճի մեջ է մտել մարտունեցի մի ուսանողի հետ` կապված բառերի արտասանության և շեշտադրման հետ:
Aravot.am-ին դիմած ուսանողները ներկայացնում են, թե դասախոսը փորձել է ծաղրել ուսանողին` Մարտունու բարբառի համար: Այս փաստն առաջացրել է ուսանողների դժգոհությունը, որոնք առանց այդ էլ մինչև այժմ խնդիրներ են ունեցել 71-ամյա դասախոսի հետ: Ուսանողներն այս հարցով դիմել են նաև բուհի ուսանողական խորհուրդ:
Մեր տեղեկություններով` այս դասախոսի շուրջ իրավիճակն այնքան է սրվել, որ մինչև անգամ դրվել է նրան հեռացնելու հարցը, բայց բուհի ղեկավարությունը դեռ բավարարվել է «նկատողությունով»:
ՀՊՏՀ Լրատվության և հասարակայնության հետ կապերի բաժնից Aravot.am-ի հարցմանը գրավոր պատասխանեցին. «ՀՊՏՀ մարքեթինգի 1-ին կուրսի ուսանողները համալսարանի ղեկավարությանը դժգոհություն են հայտնել լեզուների ամբիոնի դասախոս Մարի Զաքարյանի պահվածքից և ուսանողների նկատմամբ վերաբերմունքից: Համալսարանի պրոռեկտորներն ու ուսանողական խորհրդի նախագահը հանդիպել են կուրսի հետ, քննարկել խնդիրը: Քննարկումից հետո ուսանողները խնդրի նկատմամբ ըմբռնում են ցուցաբերել: Համալսարանի ռեկտորի հանձնարարությամբ հարցը քննարկվել է նաև Մարի Զաքարյանի հետ, նրան ներկայացվել է խիստ նախազգուշացում, որ նման դեպքի կրկնության պարագայում ինքը կհեռացվի»:
Տաթև ՀԱՐՈՒԹՅՈՒՆՅԱՆ
Սույն դասախոսը ինձ-Լյուդվիգ Գևորգյանիս-ՀՊՏՀ Հաշվապահական հաշվառման 1 կուրսի ուսանողիս-ՊՆ հայտով դասից բռնի հեռացրել է ,դասի ժամանակ խոսել ժարգոնով,հարցեր տվել երեխաներին ու վիրավորել ,ծաղրել ու նստեցրել տեղը:Դասի ժամանակ վիրավորել է մեզ ինչ-որ բաներ չիմանալու համար ու անպատվել:Դեպքը եղել է սեպտեմբերի 7-ին 3-րդ դասաժամին :Սա առանձին դեպք է ,որը աննատ է մնացել:Խնդրում եմ տարածել: