Հոկտեմբերի 10-ին Մինսկում Եվրասիական տնտեսական միությանը Հայաստանի միանալու պայմանագրի ստորագրումից առաջ Ղազախստանի նախագահ Նուրսուլթան Նազարբաեւը հայտարարել էր, թե ԵՏՄ-ին ՀՀ-ի անդամակցությունը համաձայնեցված է, եւ Ղազախստանը ՀՀ-ի անդամակցության շուրջ ոչ մի խոչընդոտ չի տեսնում։ «Հաջողվել է կոմպրոմիսային տարբերակ գտնել այն հարցի շուրջ, որ մենք տվել էինք սահմանների վերաբերյալ, որով Հայաստանը միանում է մեր միությանը»,- հայտարարել էր Նազարբաեւը չմանրամասնելով, թե ի՞նչ կոմպրոմիս է ձեռք բերվել։
Հիշեցնենք, Աստանայի գագաթնաժողովի ժամանակ Նազարբաեւն ընթերցել էր Ադրբեջանի նախագահ Իլհամ Ալիեւի նամակը եւ հայտարարել, որ Հայաստանը ԵՏՄ-ին պետք է միանա առանց Լեռնային Ղարաբաղի, որ ԼՂ-ի եւ ՀՀ-ի սահմանին պետք է մաքսակետեր դրվեն։
Երեկ անդրադառնալով Նազարբաեւի հայտարարությանը, ԼՂՀ նախագահ Բակո Սահակյանի մամուլի խոսնակ Դավիթ Բաբայանը ասաց. «Մաքսակետերի հարցը որեւէ պետության, որեւէ ուժի ճնշման կամ առաջարկի խնդիր չէ։ Մաքսակետեր եղել են Հայաստանի եւ Արցախի սահմանին պատերազմի ժամանակ։ Հիմա դրա կարիքը չկա, որովհետեւ մենք չենք տեսնում նման անհրաժեշտություն։ Եթե վաղը տեսնենք, մենք ինքներս կմտցնենք։ Այստեղ արտաքին ուժերի պրոբլեմն ընդհանրապես զրոյական է, չկա այդպիսի բան, քանի որ սա յուրահատուկ հարց է։ Ես չգիտեմ Նազարբաեւը ինչ նկատի ունի, ես այստեղ վտանգավոր բան չեմ տեսնում»։ Հարցին՝ այդուհանդերձ, Արցախի իշխանությունները փորձե՞լ են ՀՀ իշխանությունների հետ ճշտել, թե ինչ կոմպրոմիսի մասին է խոսքը, Դավիթ Բաբայանը պատասխանեց. «Ճշտելու խնդիր չկա, իրականությունը երբ դիտարկում ենք, սա առաջընթաց է։ Համենայնդեպս, քանի որ այդպիսի անհրաժեշտություն չկա, ինչ-որ մանրուքներ իմանալ պետք չէ։ Ամեն ինչ պարզ է եւ մանրանալու անհրաժեշտություն չկա։ Որեւէ խնդիր չկա այստեղ։ Ես չգիտեմ՝ ինչ է նկատի ունեցել Նազարբաեւը, բայց ասում եմ, որեւէ խոչընդոտ եւ խնդիր չկա»։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
Կարդացեք նաև
