«Կարող էր պատվիրակությունը որակով լինել, պատրաստված, քաղաքականապես լուրջ, ճկուն, մտածող մարդիկ, բայց արդյունքը փոխվել չէր կարող»,-Aravot.am-ի հարցին՝ ԵԽԽՎ-ում Ղարաբաղի մասին զեկույցի նախապատրաստումը արդյունք էր Հայաստան Եվրասիական տնտեսական միության անդամակցությա՞ն, թե՞ ԵԽԽՎ-ում Հայաստանի պատվիրակության ոչ պրոֆեսիոնալիզմի, այսպես պատասխանեց «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը: Ըստ նրա՝ ԵԽԽՎ-ում կարելի էր ազդեցիկ խոսքով ներկայացնել Հայաստանի շահերը, ընդդիմանալ, բայց, փաստաթուղթը նույնը կլիներ:
Պարոն Գիմիշյանը կարծում է, որ այս իրավիճակը ԵԽԽՎ-ի կողմից կիրառվող երկակի ստանդարտների ևս մեկ ապացույց է, որ ճիշտ-սխալ չկա, այլ կա ձեռնտու և ոչ ձեռնտու, ուժեղ, ոչ ուժեղ: Սոս Գիմիշյանը նկատում է, որ նախկինում ՀՀ-ն բոլոր ցուցակներում նպաստավոր տեղեր էր զբաղեցնում, մարդու իրավունքների, ժողովրդավարության բնագավառում առաջընթաց գրանցում, քանի որ երեքուկես տարի ասվում էր, որ գնում ենք Եվրամիություն:
Այնուհետև պարոն Գիմիշյանը նկատեց. «Հիմա, երբ որոշեցինք, որ գնում ենք Եվրասիական տնտեսական միություն, բոլոր ցուցանիշները փոխվեցին, հիմա կասեն, թե ընտրությունները կեղծվել են, կսկսեն Հայաստանին քարկոծել»:
Անկախ այս ամենից պարոն Գիմիշյանը վստահ է. «Կուզեի, որ դրսում Հայաստանը ներկայացնեին խոսքի արվեստին տիրապետող մարդիկ, ոչ թե միայն աթոռ զբաղեցնեին»:
Պարոն Գիմիշյանը անդրադարձ կատարեց նաև սահմանադրական բարեփոխումներին՝ կարծիք հայտնելով, որ դրանք ունեն իշխանության վերարտադրման նպատակ:
Կարդացեք նաև
Տաթև ՀԱՐՈՒԹՅՈՒՆՅԱՆ
