«Բա սա կառավարությո՞ւն է, Սովետական միության ժամանակվա կոստյումները կհագնինք, չհաշված վերևներում նստած սպասում են, թե երբ պիտի մենք մեռնինք: Ի՞նչ կառավարություն, երբ 20- 25 տարվա մեջ մի աշխատատեղ չստեղծեց Գյումրիում, զուտ ձեռքը տնկում է, իրեն մուրացկանի պես է պահում, դե արի ու դրան կառավարություն անվանի»,- զայրացած ասացին Գյումրու Հակոբ Մծբնեցի եկեղեցու բակում հավաքված տարեցները` պատասխանելով Aravot.am-ի հարցին, թե այս պահին իշխանափոխություն անհրաժե՞շտ է մեր երկրին, թե՞ ոչ:
Նրանք բավական մեծ հույսեր են կապում եռյակ միավորումից: «Հենց հիմա է անհրաժեշտ իշխանափոխություն մեր երկրում, ես նախագահի պաշտոնում տեսնում եմ Լարիսա Ալավերդյանին»,- ասաց նրանցից մեկը:
Մյուսն էլ կողքից արձագանքեց. «Էնտեղ Սերժին հանեք, Ռոբերտին էլ հետը, թող Ծառուկյանը նստի, երևի լավ նախագահ լինի»:
Նախագահի թեկնածուների ցանկում հնչեց նաև Րաֆֆի Հովհաննիսյանի անունը:
Կարդացեք նաև
Մեր հիշեցմանը` բա ՀՀ հիմնադիր նախագահ Լևոն Տեր-Պետրոսյա՞նը, նա էլ է եռյակի առաջնորդներից, բեմահարթակ է բարձրանում, իշխանություններին քննադատում, զրուցակիցներիցս մեկն ասաց. «Թող բեմահարթակ բարձրանա, բայց իշխանության չգա, թող նոր մարդ լինի, տեսանք էլի` ով է Լևոն Տեր-Պետրոսյանը: Իսկ իշխանափոխություն հենց էս պահին է անհրաժեշտ , ջուրը որ երկար մնաց մի տեղում, կհոտի: Մարդասպանին հարգում-պատվում, տանում, մարզպետ են նշանակում, իրենք էլ նույն են էլի, մարդասպանություն կոծկողը ինքն էլ է մարդասպան»:
Նունե ԱՐԵՎՇԱՏՅԱՆ
