«Այսօրվա իշխանություններն ազգատյաց են, թշնամի, ժողովրդի ամենաոխերիմ թշնամին՝ թուրքից առավել, որոնք այսօր մտածում են միայն Հայաստանը հայաթափեն, որ ոչինչ չմնա Հայաստանում, իրենք տիրապետեն չգիտեմ ինչին: Երեւանը աղբակույտի է վերածված, իրենց նման աղբ է դարձել արդեն Հայաստանը՝ կառավարության անդամներով հանդերձ: Խորհրդարան, դեպուտատներ, իշխանություն, բոլորը դարձել են աղբ»,- Aravot.am-ի հետ զրույցում իշխանություններից այսպես դժգոհեց եռյակի հանրահավաքին մասնակցելու համար Ազատության հրապարակ եկած Վիկտոր Պողոսյանը:
Մեր հարցին, որ եռյակի ուժերը հայտարարել են, որ իրենց օրակարգը պետք է թելադրի ժողովուրդը, իրենք կհետեւեն ժողովրդի պահանջին, ո՞րն է Ձեր պահանջը՝ հանրահավաքի մասնակիցը պատասխանեց. «Ժողովրդի պահանջը 90 թվից ոչ մեկը չի անում:
Լեւոն Տեր-Պետրոսյանն արեց, կռիվ էր, իրան ներեք ինչ-որ հանգամանքներում: Ռոբերտ Քոչարյանը, Սերժ Սարգսյանն այսօր Հայաստանը հայաթափում են, ուտում են Հայաստանի ժողովրդի արյունը: Թույլ չեն տալիս ոչ մի կերպ առաջ գնալ: Եթե մեկը ինչ-որ մի փոքր կրպակ է դնում, գլխին խփում են, թույլ չեն տալիս աշխատի: Շուկային թողել են անսահմանափակ իրավունքներ, ով ինչ ուզում, վաճառում է՝ ամենակեղտոտ ապրանքները: Կներեք, որ մտնում եմ անձնական շահերի մեջ, բայց ես երեկ սխտոր եմ առել՝ ի՞նչ սխտոր, կապտել է, դարձել է լողակ: Գնացել հարցնում եմ՝ ընկեր ջան, սա որտեղի՞ց են ներկրել, ասում է՝ պարսկական է կամ չինական: Ինչի՞ են ներկրում դա, երբ ժողովրդին թունավորում է: Ես 10 կգ առել եմ, որ բիբար փակեմ: Չգիտեմ, փակե՞մ դա, թե՞ տամ, որ Սերժն ուտի»:
Նա վստահեցրեց, որ առաջին ցուցարարը ինքն է եղել, որ հայտարարել է, որ պետք է պայքարել Ադրբեջանի դեմ. «Իմ թեւերը ծալել են, ասել են, որ դա սադրիչ է: Անձնագիրս ցույց եմ տվել, տեսել են, որ հայ քաղաքացի եմ: Այսօր էլ պատրաստ եմ պայքարել Ադրբեջանի դեմ եւ մի շաբաթում Բաքուն մտցնել Կասպից ծովի մեջ, խեղդել Ադրբեջանը: Բայց այսօր իրենք թշնամի են մեզ ու այսօր մեզ ուզում են տանեն ամենամեծ ողբերգությանը»,- ասաց ցուցարարը:
Հռիփսիմե ՋԵԲԵՋՅԱՆ
Կարդացեք նաև
Դուխդ լավն ա, պապի ջան: