Երկօրյա տոնակատարությունների առաջին օրվա միջոցառումները մեկնարկել են Էրեբունի վարչական շրջանի Էրեբունի փողոցում։ Էրեբունի պատմահնագիտական արգելոց-թանգարանից մինչև Էրեբունի-Ազատամարտիկներ փողոցների խաչմերուկը մեծ տոնավաճառ էր։ Շուրջ 90 տաղավարներում ժողովրդական արվեստի ձեռագործերի՝ զարդերի, հուշանվերների, տարազի տարրերով հագուստի ցուցահանդես վաճառք էր, ազգային խոհանոցի տոնավաճառ։ Տաղավարներից մեկում էլ վարպետ կավագործները երեխաներին նաև ցուցադրում էին, թե ինչպես են անձև կավից կահկարասի ստեղծում։
Մի քանի տաղավարներում կերպարվեստի ստեղծագործությունների ցուցահանդես-վաճառք էր։ Կերպարվեստի տաղավարներում գեղարվեստի տարբեր կրթօջախների սաների աշխատանքներ էլ էին ներկայացված՝ ամենատարբեր թեմաներով ստեղծագործություններով։ Էրեբունի փողոցն ամբողջ երկարությամբ զարդարված է եռագույններով ու տոնի խորհրդանշաններով։
Փողոցի ողջ երկայնքով նաև տասնյակ բեմեր են՝ բազմազան միջոցառումներով։
Երեւանի քաղաքապետարան
