Հունիսի 1-ին Երեւանի փոխոստիկանապետ Վալերի Օսիպյանի եղբորորդու մասնակցությամբ տեղի ունեցած վիճաբանության վկա Սարգիս Հովհաննիսյանի մոր եւ Օսիպյանի խանութի աշխատակցի ու մորեղբորորդու միջեւ առաջիկայում առերեսում է նախատեսված:
Սարգիս Հովհաննիսյանի մայրը՝ Սուսան Հովհաննիսյանը, Aravot.am-ին պատմեց, որ հոկտեմբերի 8-ին առերեսման ծանուցում էին ստացել, բայց Օսիպյանի աշխատակիցն ու մորեղբորորդին այդպես էլ ՀԿԳ չէին եկել:
Տիկին Հովհաննիսյանի խոսքով, ինքը մի շարք հարցեր ուներ նրանց. «Դեպքի օրը Օսիպյանենց տուն էինք գնացել, մորաքրոջ տղան այնտեղ էր, հետո գնացել հարեւանի տուն, ես հարցեր պետք է տայի, բայց ինքը չեկավ: Իսկ Օսիպյանի խանութի չգրանցված աշխատակիցը՝ Մարիետա Սարգսյանը սուտ ցուցմունք էր տվել, թե ես իբր ասել եմ դանակը տեսել եմ, չափսն էլ ցույց եմ տվել: Սա այն նույն կինն է, որից Օսիպյանը իմ ավագ տղայի հեռախոսահամարն էր ուզում, երբ ես իրենց խանութում էի»:
Ըստ նրա, հոկտեմբերի 8-ին հարցաքննվել է նաեւ տուժողի՝ Վանուշ Ալեքսանյանի մայրը. «Օսիպյանների հետ մեր առերեսման օրը, երբ տեսա Վանուշի մորը, քննիչին ասացի, թող հանեն դեպքի արձանագրությունները, թե, երբ Սեդրակը հասել է Վանուշենց շենքի բակ ու հայհոյել Վանուշի մորը, իմ տղան է մոտեցել ու ներողություն խնդրել՝ բացատրելով, որ Սեդրակը խմած է: Իսկ դանակահարության օրը, էլի իմ տղան է մոտեցել ու կրկին ասել, որ ներեք, որովհետեւ խմած է: Իմ տղան դանակահարություն կարո՞ղ է անել, հիմա էլ ուզում են խմբակային դանակահարություն սարքեն»:
Կարդացեք նաև
Հաջորդ առերեսման օրվա մասին դեռ ծանուցում չեն ստացել:
Արփինե ՍԻՄՈՆՅԱՆ
