Այսօր «Երեւան-2025» միջազգային կոնֆերանս է կազմակերպվել՝ նվիրված մայրաքաղաքի մի շարք խնդիրների լուծմանն ու զարգացման հեռանկարներին:
Կոնֆերանսին ելույթ ունեցավ փոխքաղաքապետ Կամո Արեյանը, որն ի թիվս մի շարք ծրագրերի, վստահեցրեց, որ մինչեւ 2025 թվականը Երեւանը կունենա աղբամշակման կայան:
Արեյանի զեկույցն ավելի շատ հետաքրքրում էր «Բարեւ Երեւան» խմբակցության անդամ Անահիտ Բախշյանին, որը ելույթը լսելուց հետո մեզ հետ զրույցում կիսվեց իր տպավորություններով:
Տիկին Բախշյանի խոսքերով` «Ճապոնացիներն աղբի վերամշակման կայան պիտի կառուցեին, բայց հիմա չկան, չգիտեմ ինչ եղան: Պարոն Արեյանի զեկույցը Երեւանի աղբահանության մասին էր: Ասեմ, որ 2 օպերատորներ, որոնք շահել են Համաշխարհային բանկի մրցույթը` աղբահանություն կազմակերպելու, մեկը`լիբանանյան կազմակերպություն է, մյուսը` շվեյցարական: Աղբահանություն պիտի անեն ու նորից պիտի աղբը տանեն Նուբարաշեն, իսկ աղբի վերամշակումը մնաց 2025 թվին»:
Կարդացեք նաև
Տիկին Բախշյանի ներկայացմամբ`աղբահանության վճարը չի բարձրանա, բայց կարծում է, որ աղբահանության որակն ավելի լավը կլինի: Ու թեեւ տիկին Բախշյանը տեսել է այդ ընկերությունների աղբատար մեքենաների նկարները, ու շատ է հավանել, բայց ուզում է տեսնել այդ աղբահանող ընկերությունների ղեկավարներին անձամբ. «Ուզում եմ տեսնել այդ օպերատորների ղեկավարներին, որ չլինեն հայ»:
Մենք Երեւանի քաղաքապետ Տարոն Մարգարյանին փոխանցեցինք տիկին Բախշյանի ցանկությունը, քաղաքապետը խոստացավ, որ ավագանու անդամն անպայման կտեսնի երկու օպերատորների ղեկավարներին:
Նելլի ԲԱԲԱՅԱՆ
