Սեռավարակ ունեցող հիվանդին, երբ մաշկավեներաբան Հովհաննես Հովհաննիսյանը հարցրել է, թե ինչո՞ւ չի պաշտպանվել անծանոթ կնոջ հետ սեռական հարաբերություն ունենալիս, պատասխանել է` բայց նա բժշկուհի էր: Այս մասին այսօր «Հենարան» ակումբում պատմեց Հովհաննես Հովհաննիսյանը:
Սեռավարակաբանը զգուշացնում է, որ եթե զուգընկերոջը չեք ճանաչում չպետք է ռիսկի գնալ եւ վտանգավոր սեռական հարաբերություն ունենալ: Բժիշկ Հովհաննիսյանի տվյալներով, համեմատությամբ աֆրիկյան երկրների, Ռուսաստանի, Հայաստանում սեռավարակների տարածվածությունը շատ ցածր է, բայց եթե համեմատենք Արեւելյան Եվրոպայի երկրների հետ, մեզ մոտ ցուցանիշը բարձր է:
Բժշկի խոսքերով, սեռավարակներն առաջին հերթին հարվածում են կնոջ եւ տղամարդու վերարտադրողականությանը: Կան սեռավարակներ, որ ժամանակին չհայտնաբերելու եւ չբուժելու դեպքում բերում են անպտղության, հղի կանանց մոտ անգամ պտղի վիժման, հղիության ընդհատման եւ այլն:
Ասուլիսի մեկ այլ մասնակից սեքսապաթոլոգ Մարատ Զաքարյանն ասաց, որ ինչպես Աստվածաշնչում, այնպես էլ սեքսի մասին կա 10 պատվիրան, որից մեկը`մարդը պետք է կարողանա զսպել իր ցանկությունը:
Կարդացեք նաև
Ըստ նրա, սուր սեռավարակների` գոնորեայի, տրիխոմոնազի վարակման դեպքում մեծ բարդություններ կարող են առաջանալ` սկսած ֆիզիկականից, վերջացրած հոգեբանական ընկճվածությունով:
Հովհաննես Հովհաննիսյանի ներկայացմամբ, սեռավարակների փոխանցման համար բավական է ընդամենը մեկ անպաշտպան սեռական հարաբերությունը: Նրա տվյալներով, անցյալ տարի սեռավարակ ունեցողների 48 հազար դեպք է գրանցվել մեր երկրում, ինչը սակայն իրական պատկերը չի, քանի որ բժշկի խոսքերով շատ կլինիկաներում հիվանդները այցելում են, բայց չեն գրանցվում:
Այս վարակներն ավելի շատ ունենում են կոմերցիոն սեքսի կանայք` մարմնավաճառները. «Մեր կենտրոնում 1400 մարմնավաճառ է հետազոտության ենթարկվել, որից 45 տոկոսն ունեցել են սեռավարակ»: Բժիշկը նաեւ ասաց, որ մեր երկրում ավելացել է ՄԻԱՎ-ի տարածումը հետերոսեքսուալ կապի միջոցով:
Սեռավարակներն ավելի շատ տարածված են 14-15 տարեկան անչափահասների մոտ, քանի որ հենց նրանք տեղեկացված չեն, թե ինչպես անվտանգ սեռական հարաբերություն ունենան, որպեսզի խնդիրների առաջ չկանգնեն: Մինչդեռ սեռավարակաբանը վստահեցնում է, որ պահպանակի ճիշտ օգտագործումը հարյուր տոկոսով պաշտպանում է վտանգավոր սեռական կապերից. «Մարդուն ճանաչելը դեռ բավարար պայման չէ, որ նրա հետ ունենան սեռական հարաբերություն»:
Վտանգավոր սեռական հարաբերությունից պետք է անցնի վեց ամիս, որպեսզի մարդն իմանա այս կամ այն սեռավարակով հիվանդ է թե ոչ:
Լուսինե ԲՈՒԴԱՂՅԱՆ
