Ծառուկյանի թեկնածության մասին. «Վերջին խոսքը Հանրապետականինն է»

«Բարի ցանկությունների դաշտից է, մարդը ցանկություն է հայտնում»,-այսպես Aravot.am-ի հետը զրույցում արձագանքեց Հանրապետական խմբակցության պատգամավոր Սուքիաս Ավետիսյանը ԲՀԿ առաջնորդ Գագիկ Ծառուկյանի` նախագահի թեկնածություն դնելու այսօր արած հայտարարությանը: Իսկ կառաջադրեն, թե` ոչ, ըստ պարոն Ավետիսյանի, հանրությունը, ժողովուրդը կորոշի:

Հիշեցնենք, որ «Բարգավաճ Հայաստան» կուսակցության ղեկավարն այսօր լրագրողներին ասել է` «Եթե իմ քաղաքական գործընկերները, հանրությունը ներկայացրեցին, որ իմ կարիքը կա այդ դժվարին պահին, որ իմ թեկնածությունը պետք է դնել, հիմա ասում եմ, որ ես դրան էլ եմ պատրաստ»:

Aravot.am-ի այն դիտարկմանը, որ Եռյակի հանրահավաքներին մի խումբ մարդիկ «Ծառուկյան նախագահ»-են կանչում, կարծես թե հանրության մի մաս այդ պահանջը դնում է, պարոն Ավետիսյանն ասաց, որ տարբեր մարդիկ տարբեր մարդկանց կարող են ուզենալ նախագահ տեսնել. «Չեմ կարծում, որ կուսակցական լիդերներ լինեն, որոնց ասեն` ուզում ենք նախագահ, իրենք ասեն` չենք ուզում: Այսօր շատ հետարքրքիր իրավիճակ է, բայց, համենայնդեպս, դեռեւս իշխանությունն իր խոսքը չի ասել, ընտրությունները կգան, Հանրապետական կուսակցությունն իր ծանր խոսքը կասի: Իսկ մնացածն ի՞նչ է` քաղաքական թեժ աշուն է, փորձում են ամեն մեկն յուրովի իր ցանկություններով ու մտահղացումներով կիսվի, նորմալ է: Իսկ խոսքը, վերջին հաշվով, մնում է Հանրապետականին, որը, ժամանակը կգա`իր խոսքը կասի»:

Եռյակի խոստացած վաղվա հուժկու հանրահավաքից կարծես թե իշխանափոխության գործընթաց է սկսվելու, մեր այս դիտարկմանն էլ ՀՀԿ պատգամավորն արձագանքեց. «Ես նորմալ եմ վերաբերվում հանրահավաքներին, եթե դրանք ցիվիլ են, ոչ թե անկառավարելի: Ցանկացած հանրահավաքի ժամանակ կարելի է ցանկացած տիպի կոչեր հնչեցնել, լինում են մարդիկ, որ ոգեւորվում են` հենց էդ ամբիոնը տեսնում են, փորձում են իրենց այլ կարգավիճակում տեսնել: Բայց, ցանկացած իշխանափոխություն, դա մենք գիտենք, Սահմանադրական նորմ է, այնպես որ, հանրահավաքին կարող են մարդիկ ոգեւորվեն, ճառեր ասեն, բայց իշխանափոխությունը ցիվիլ ձեւին, Սահմանադրությանը պետք է համապատասխանի` օրինական ընտրություններ»:

Նելլի ԲԱԲԱՅԱՆ