«Հայաստանի դատական համակարգին անդրադառնալուց պետք է հիշել Մարդու իրավունքների եւ հիմնարար ազատությունների պաշտպանության եվրոպական կոնվենցիայի վեցերորդ կետին համապատասխանո՞ւմ է համակարգը, թե՞ ոչ»- այսօր՝ հոկտեմբերի 9-ին, «Մեդիա կենտրոնում» լրագրողների հետ հանդիպման ընթացքում հայտարարեց Հայաստանի Հելսինկյան կոմիտեի նախագահ Ավետիք Իշխանյանը:
Նա նշեց, որ, որպես կանոն, մարդու իրավունքները խախտում է գործադիր իշխանությունը, իսկ երբ քաղաքացին ցանկանում է վերականգնել իր խախտված իրավունքները, պետք է դիմի պետության այն օղակին, որը կախված չէ գործադիր իշխանությունից.
«Պետք չէ սպասել, որ կլինի այնպիսի նախագահ, որ այնքան բարի կլինի, որ դատավորներին իսկապես կասի, որ անկախ իրենից արդար աշխատեն, այդպիսի բան չի լինի: Դա հեքիաթներում է»:
Անդրադառնալով սահմանադրական բարեփոխումներին` պարոն Իշխանյանը նշեց, որ փաթեթում իրական փոփոխություններ առկա չեն: Ավետիք Իշխանյանը հավելեց, որ ինքը կողմ է խորհրդարանական պետությանը եւ համարում է, որ դատական իշխանության անկախությունը լինում է միայն խորհրդարանական համակարգում, սակայն ինքը հայեցակարգում նման նախագիծ չի տեսել.
Կարդացեք նաև
«Ես այդ փաթեթում չեմ տեսել տող, որտեղ գրված լինի` ինչպես պետք է դատական օրենսգիրքը փոփոխել, որպեսզի նախագահի ազդեցությունը չլինի դատավորների վրա»:
Իսկ Եվրասիական տնտեսական միությանը Հայաստանի հնարավոր անդամակցության դեպքում, պարոն Իշխանյանի կարծիքով` կարելի է արդեն մոռանալ դատական իշխանության մասին.
«Եթե այդ կառույցը այն լինի, ինչ ենթադրում է նրա նախաձեռնողը, ինչքան էլ ասենք տնտեսական կառույց, սրա ամբողջ միտքը քաղաքական է` Խորհրդային Միությունից հետո հերթական կայսրությունն է լինելու, որտեղ ընդհանուր քաղաքական խաղի կանոններ են լինելու եւ արժեքային համակարգը նույնն է լինելու, այսինքն` պարտադրվելու է»:
Ամի ՉԻՉԱԿՅԱՆ
