Մեսրոպ Մաշտոցի անվան հին ձեռագրերի գիտահետազոտական ինստիտուտում՝ Մատենադարանում, Հայագիտական ուսումնասիրությունների միջազգային ընկերակցությունն (AIEA/ՀՈՒՄԸ) այսօր անցկացրեց իր հերթական՝ Հայագիտական միջազգային 13-րդ համաժողովը:
Համաժողովը, որին մասնակցում են հայագետներ տարբեր երկրներից, կշարունակվի մինչև հոկտեմբերի 11-ը:
Միջոցառման մեկնարկին մասնակիցներին ողջունելու էին եկել ՀՀ նախագահի աշխատակազմի ղեկավար, Մատենադարանի կառավարման խորհրդի նախագահ Վիգեն Սարգսյանը և ՀՀ ԿԳ նախարար Արմեն Աշոտյանը:
«Հայագիտական ուսումնասիրությունների միջազգային ընկերակցությունը տասնամյակների ուղի է անցել, այն իր 33-ամյա պատմության ընթացքում բազմաթիվ հաջողություններ ու մեծ ձեռքբերումներ է գրանցել հայագիտության ոլորտում: Անվիճելի է ընկերակցության դերը նաև տարբեր հայագետների գիտական շփումների և կապերի ձևավորման ու ամրապնդման հարցում: Հուսով եմ՝ այս ընթացքը շարունակական կլինի: Մենք լիահույս ենք, որ ընկերակցության անդամները, որոնք 400-ն են, կդառնան լիիրավ մատենադարանցիներ»,- իր ողջույնի խոսքում ասաց Մատենադարանի տնօրեն Հրաչյա Թամրազյանը:
Կարդացեք նաև
«Հենց հայագետներով է իմաստավորվում այս բացառիկ, ազգային գանձի դերը մեր ազգային ինքնության լիարժեք գիտակցման և ազգայինը պահելու գործում: Հետևաբար, շատ ուրախ եմ, որ հայագետները հավաքվել են Հայաստանում և անդրադառնում են իրենց մասնագիտական գործունեությանը»,- ասաց ՀՀ նախագահի աշխատակազմի ղեկավար, Մատենադարանի կառավարման խորհրդի նախագահ Վիգեն Սարգսյանը:
«Չկա այնպիսի մի ոլորտ, որտեղ ուսումնասիրություններ չլինեն անելու: Տարբեր տեսակետներն ու բանավեճերը երբեք թույլ չեն տա, որ ուսումնասիրություններն ավարտվեն: Անձամբ ինձ հիմա շատ է մտահոգում հայ ժողովրդի ծագման հարցի՝ չափից դուրս քաղաքականացված լինելը,- լրագրողների հետ ճեպազրույցում ասաց ամերիկահայ պատմաբան Ռիչարդ Հովհաննիսյանը,- ավելի լուրջ ուսումնասիրություններ են պետք:
Մեզ թվում է, թե մենք, օրինակ, Հայոց ցեղասպանության մասին ամեն ինչ գիտենք, բայց դա այդպես չէ: Դժբախտաբար, շատ քիչ թուրքագետներ, օսմանագետներ ունենք»:
Սիրանուշ ՀԱՅՐԱՊԵՏՅԱՆ
