«12+1 կետերի միասնական գնահատականը տրված է, հայտարարությունը վաղը կտրվի մամուլին, երեք կուսակցությունների`ԲՀԿ, ՀԱԿ եւ «Ժառանգություն» ղեկավարներն էլ մասնակցելու են վաղվա հանրահավաքին, հանրահավաքից հետո կլինի երթ`ամենայն հավանականությամբ Մաշտոցի պողոտա-Ամիրյան-հրապարակ երթուղով»,- քիչ առաջ ավարտված եռյակի նիստից հետո լրագրողների հետ զրույցում ասաց «Ժառանգություն» խմբակցության ղեկավար Ռուբեն Հակոբյանը: Եռյակի նիստում քննարկվել են նաեւ այլ` կազմակերպչական հարցերին վերաբերող խնդիրներ:
Aravot.am-ի հարցին`քննարկման ժամանակ հստակեցվե՞ց`վաղը հարթակից հրաժարականի պահանջ հնչելո՞ւ է եւ ո՞ւմ հրաժարականի պահանջն է հնչելու, մանավանդ, որ երեք կուսակցությունների առաջնորդներն էլ մասնակցելու են հանրահավաքին, Ռուբեն Հակոբյանն ասաց. «Այդ քաղաքական օրակարգը վաղն ամբողջությամբ ձեզ կտան»:
Մեր հստակեցնող հարցին`որոշում կա վա՞ղը կհրապարակվի, թե՞ դեռ հստակ որոշում չկա, բանախոսը պատասխանեց. «Գոնե վերջին երկու-երեք հանրահավաքների ժամանակ բոլոր քաղաքական ուժերի ներկայացուցիչների կողմից արդեն հայտարարվեց, որ այս համախմբումը, եռամիասնության քաղաքական օրակարգը ամբողջական իշխանափոխությունն է»:
Լրագրողներից մեկի հարցին, որ ՀՀԿ-ականները թերահավատ են ընկալում իշխանափոխության մասին բոլոր հայտարարությունները, քանի դեռ դրանք չեն հնչեցրել եռյակի լիդերները: Կհնչի՞ արդեն լիդերների կողմից իշխանափոխության պահանջ, Հակոբյանն ասաց. «ՀՀԿ կուսակցության իմ հարգելի գործընկեր-պատգամավորներին, բոլորին վաղը հրավիրում եմ հանրահավաքին լսել, թե ո՞ր առաջնորդն ինչպիսի ասելիքով է ներկայանալու»:
Կարդացեք նաև
Aravot.am-ի հստակեցնող հարցին`եռյակի առաջնորդների ելույթնե՞ր էլ են նախատեսված, պարոն Հակոբյանն ասաց. «Ցանկության հարց է: Ես կարող եմ ասել, որ Րաֆֆի Հովհաննիսյանը ելույթ ունենալու է»:
Հանրահավաքում շեշտը դրվելու է իշխանափոխությա՞ն վրա`հարցի պատասխանն էլ եղավ. «Ընդգրկուն օրակարգ կլինի, ոչ միայն կներկայանանք, կասենք, իշխանափոխություն և վերջ։ Անդրադարձ կլինի նաև սահմանադրական փոփոխություններին և 12 կետերին»:
Այլ մանրամասները`տեսանյութում
Նելլի ԳՐԻԳՈՐՅԱՆ
