Իջեւանի տարածաշրջանի Դիտավան գյուղի բնակիչ Արշակ Սարիբեկյանը ազատամարտի տարիներին եղել է սահմանապահ դասակի հրամանատար, իր անձնական տնտեսությունից մեծ քանակի սնունդ նվիրաբերել նորաստեղծ բանակին: Նա այժմ անհատ ձեռներեց է, նաեւ՝ Հայաստանի հանրային խորհրդի գյուղատնտեսության եւ բնապահպանության հանձնաժողովի անդամ:
Արշակի վաղեմի երազանքն է Իջեւան քաղաքում կանգնեցնել Սեւքարեցի Սաքոյի արձանը: Անցած տարիներին նա այդ հարցով բազմաթիվ պաշտոնյաների է հանդիպել: Անցյալ տարվա ամռանը Տավուշի մարզպետարանում նա հանդիպել է նախկին մարզպետ Արմեն Ղուլարյանին եւ պաշտպանության նախարար Սեյրան Օհանյանին:
Արշակը պատմեց, որ մարզպետը իրեն ներկայացնելով Ս. Օհանյանին՝ ասել է, թե Ա. Սարիբեկյանը պատրաստ է մեծ ֆիդայու արձանը Իջեւանում կանգնեցնելու համար նույնիսկ վաճառել իր տունն ու ունեցվածքը: Ս. Օհանյանն ասել է, թե ինքն էլ այդ գործի համար իր մեկ ամսվա աշխատավարձը կտա:
Ա. Սարիբեկյանը հայտնեց, որ Իջեւանի Ազատամարտիկների հրապարակին կից գտնվող Սեւքարեցի Սաքոյի փողոցում արդեն հաստատվել է արձանի տեղադրման վայրը:
Կարդացեք նաև
Այժմ Ա. Սարիբեկյանը զբաղվում է արձանի համար բազալտի մեծ քարաբեկորի հայթայթման խնդրով:
Ոսկան ՍԱՐԳՍՅԱՆ
