Կենդանիների պաշտպանության միջազգային օրը (հոկտեմբերի 4), տեղի ունեցավ գրող, բլոգեր Առլեն Շահվերդյանի «Լռության գինը» նոր գրքի հեռուստաշնորհանդեսը Հայաստանի Հանրային հեռուստատեսության «Առաջին լրատվական» ծրագրի գլխավոր թողարկման ժամանակ:
«Լռության գինը» գիրքը լույս է ընծայվել Բնության համաշխարհային հիմնադրամի հայաստանյան մասնաճյուղի (WWF-Հայաստան) ֆինանսական աջակցությամբ և մասնագիտական խորհրդատվությամբ: Այն նվիրված է կովկասյան ընձառյուծին, Հայաստանում խիստ հազվագյուտ և հրաշագեղ այս կենդանու պահպանությանն ուղղված WWF-Հայաստանի բազմամյա, օգտակար ու հետևողական ջանքերին, ինչպես նաև Հայաստանի պատմամշակութային ժառանգությանը:
Առլեն Շահվերդյան
«Լռության գինը» երկրորդ գիրքն է, որը լույս է ընծայվում WWF-Հայաստանի աջակցությամբ: Ընթերցողները հիշում են, որ առյուծ կենդանատեսակին նվիրված «Ապրելու իրավունք» վերնագրով Առլեն Շահվերդյանի նախորդ գիրքը, իր բովանդակային ընդգրկմամբ և բնապահպանական հարցադրումով արժանանալով Բնության համաշխարհային հիմնադրամի հայաստանյան մասնաճյուղի ուշադրությանը, լույս տեսավ WWF-Հայաստանի ֆինանսական աջակցությամբ, 2011 թվականին: Գիրքը լայն արձագանք գտավ մասնագիտական շրջանակներում, ԶԼՄ-ներում, ընթերցասեր ու բնասեր հասարակության շրջանում: Այն նվիրաբերվեց մասնագիտական կառույցներին, կրթական հաստատություններին, գրանցվեց գրադարաններում, այդ թվում՝ ԱՄՆ-ի Կոնգրեսի գրադարանում:
«Լռության գինը» բնաճանաչողական և բնապահպանական բովանդակությամբ նոր գրքի առանցքում դարձյալ մարդ–բնություն ներդաշնակ հարաբերության կարևորումն է: Գրքում նշվում է բնության նկատմամբ հոգատար ու խոհեմ վերաբերմունքի խիստ անհրաժեշտությունը: Լռությունը, անտարբերությունը անպաշտպան են թողնում վայրի բնությանը, հաճախ լռության գինը վայրի բնության խաղաղ ու անվնաս գոյության վտանգումն է:
Կարդացեք նաև
«Լռության գինը» գիրքը տպագրվել է «Սամարկ» տպագրատանը:
Հեղինակի համար հատկապես ուրախալի է, որ գրքի հանրահռչակումը տեղի ունեցավ Կենդանիների պաշտպանության միջազգային օրը, ինչը շատ խորհրդանշական էր իր համար՝ որպես նվիրյալ բնասեր գրողի:
«Լռության գինը» գիրքը ենթակա չէ վաճառքի, այն չունի կոմերցիոն նպատակ և որպես նվիրատվություն տրամադրվելու է մասնագիտական շրջանակներին, բնասերներին: Գրքի առցանց ամբողջական տարբերակը բաց տեղադրված է Առլեն Շահվերդյանի հեղինակային բլոգ-կայքում և հասանելի է բոլոր ընթերցասերներին: Գիրքը կարելի է գտնել նաև Հայաստանի ազգային գրադարանում և Երևանի Ավետիք Իսահակյանի անվան կենտրոնական գրադարանում:
Առլեն Շահվերդյան
Գրող, բլոգեր
