Սեպտեմբերի 27-ին Վրաստանի Թեքալի գյուղում Ադրբեջանի գիտությունների ազգային ակադեմիայի փիլիսոփայության, սոցիոլոգիայի եւ իրավունքի ինստիտուտի բաժնի վարիչ Ալի Աբասովին հարցրեցինք վերջին շրջանում Ադրբեջանի եւ Ռուսաստանի հարաբերությունների ջերմացման պատճառների մասին:
Նա ասաց. «Եթե անդրադառնանք անցյալին, կտեսնենք, որ հարաբերությունների սառեցման, ջերմացման տարբեր փուլեր շատ են եղել: Հիմա հերթական ալիքն է: Քանի որ Ադրբեջանը եւ Հայաստանը փոքր երկրներ են,նրանք կախված են մեծ երկրների դրությունից: Դրանք ԱՄՆ-ը եւ Ռուսաստանն են, որոշ չափով՝ Եվրամիությունը,որը սկսել է Հարավային Կովկասի որոշ երկրների ասոցիատիվ անդամության քաղաքականությունը: Այդ պատճառով ես կարծում եմ,որ դա հավասարակշռության քաղաքականության արդյունք է: Հայաստանը եւ Ադրբեջանը փորձում են հավասարակշռել Արեւմուտքի եւ Ռուսաստանի միջեւ, որքանով դա հաջողում է՝ պաշտպանելով նաեւ սեփական շահերը: Արեւմուտքի կողմից Ադրբեջանի վրա մարդու իրավունքների պաշտպանության գծով մեծ ճնշում կա, բնական է, որ դեպի Ռուսաստան շարժ է կատարվում: Դա ինչ-որ նոր բան չէ, արդեն երկու տասնամյակ ձգվող, Ռուսաստանի եւ Ադրբեջանի միջեւ հավասարակշռության քաղաքականություն է»:
Ոսկան ՍԱՐԳՍՅԱՆ
