«Առարկում եմ: Ընդհանրապես ցանկություն չունեմ լուսանկարվելու, քանի որ այդ տեսանյութերը, լուսանկարները հայտնվում են սոցիալական կայքերում, այնտեղ մեկնաբանվում են: Այն հանրությունը, որը դա դիտում է, մեկնաբանում է իմ անձը՝ իրենց լայքերով, բազմաթիվ մեկնաբանություններով եւ այլն»,- այսօր Վարչական դատարանում այսպես ոստիկանության ներկայացուցիչ փաստաբանը՝ Սոնա Մելիքյանը թույլ չտվեց Aravot.am-ին դատական նիստի ընթացքում լուսանկարներ անել կամ տեսաձայնագրել:
Այդ մասին ակտիվիստ Ռուզաննա Գրիգորյանի ներկայացուցիչ, իրավապաշտպան Արտակ Զեյնալյանի միջնորդությունը դատարանը մերժեց, քանի որ կողմերից մեկը դեմ էր:
Արտակ Զեյնալյանը հարցրեց՝ առարկության հիմքը ո՞րն է, եթե լայքերին եք դեմ, այդ դեպքում դատավորը թող արգելի լայք տալ այդ լուսանկարներին: Ոստիկանության ներկայացուցիչը չհամոզվեց. «Պետք չի ինձ, զերծ մնամ լուսանկարվել»:
Արտակ Զեյնալյանը ճշտեց՝ էսքիզներ անե՞լ էլ չի կարելի՝ ձեռքով նկարել՝ Սոնա Մելիքյանը բարկացավ. «Ոչ մի ձեւով, ոչ մի եղանակով ես ցանկություն չունեմ, որ ինձ նկարեն»:
Կարդացեք նաև
182 հոդվածի հատկանիշներով մեկ այլ դատական նիստում դարձյալ ոստիկանության ներկայացուցիչը՝ Մարիաննա Թումանյանը թույլ չտվեց դատական նիստի ընթացքում լուսանկարել կամ տեսանկարահանել:
Արտակ Զեյնալյանը այս անգամ էլ փորձեց ճշտել, թե ի՞նչ հիմքով են առարկում, եթե հրապարակային դատաքննություն է եւ հանրային իրավահարաբերությունների մեջ են: Ոստիկանության ներկայացուցիչը պարզապես չէր ուզում եւ վերջ:
Արտակ Զեյնալյանի խոսքերով՝ «Դուք պաշտոնատար անձ եք եւ ներկայացնում եք Հայաստանի Հանրապետությունը: Դուք ծառայության մեջ գտնվելիս ձեր անձնական այդ մի հատվածը դրել եք մի կողմ, հիմա ի՞նչ հիմք կա հրաժարվելու: Դուք արդեն իսկ ոստիկան լինելով՝ հրաժարվում եք անձնական կյանքից, եթե եկել եք դատարան, արդեն պետք է պատրաստ լինեք դրան»: Ոստիկանության ներկայացուցիչը տեղի չտվեց:
Հռիփսիմե ՋԵԲԵՋՅԱՆ
