Aravot.am-ը երեկ տեղեկացրել էր , որ «Հարավկովկասյան երկաթուղի» ՓԲԸ-ին պատկանող բեռնատար գնացքներից մեկը Շորժայի կայարանամերձ հատվածում վթարի է ենթարկվել: Այսօր Aravot.am-ը իր աղբյուրից տեղեկացավ, որ վթարի պատճառի նախնական վարկածը գնացքի վագոններից մեկի անսարքությունն է եղել. «Ջարդվել է շկոռին»,- ասաց աղբյուրը:
Դեպքի հետ կապված Aravot.am-ը պարզաբանում խնդրեց նաեւ «Հարավկովկասյան երկաթուղի» ՓԲԸ-ի Մամուլի եւ հասարակայնության հետ կապերի բաժնից: Այստեղ հաստատեցին, վթարի հետ կապված Aravot.am-ի պարզած մանրամասները. ոսկու հումք տեղափոխող բեռնատար գնացքի տասը վագոնը դուրս է եկել ռելսերից: Վագոններից մի մասը կողաշրջվել է: Մարդկային կորուստներ կամ լուրջ վնասվածքներ չեն եղել: Վթարի պատճառների եւ նյութական վնասների մասին առայժմ ոչինչ չկարողացան ասել, միայն նշեցին՝ կազմվել է հատուկ հանձնաժողով, որը պետք է քննի դեպքը:
Պատվիրատու ընկերությանը պատճառված հնարավոր վնասները «Հարավկովկասյան երկաթուղի» ՓԲԸ-ն կփոխհատուցի՝ հնարավոր վնասի չափը գնահատելուց հետո:
Հռիփսիմե ՀՈՎՀԱՆՆԻՍՅԱՆ
Կարդացեք նաև
Լուսանկարը` արխիվային
