«Ենթադրում եմ, որ հոկտեմբերի 10-ին ստորագրություն կլինի: Եվրասիական միությանն անդամակցելը բխում է մեր անվտանգության շահերից, և կարծում եմ, որ տարբերակված պետք է լինեն հարաբերությունները տնտեսական բլոկում»,-այսօր «Պոստ սկրիպտում» մամուլի ակումբում լրագրողների հետ հանդիպմանը հայտարարեց ՀՀ ԱԺ «Օրինաց երկիր» խմբակցության քարտուղար Մհեր Շահգելդյանը:
Aravot.am-ի հարցին, բայց Կրեմլի հրապարակած օրակարգում Հայաստանին վերաբերող կետ չկա, պարոն Շահգելդյանն արձագանքեց. «Ես կարող եմ ենթադրել ստորագրության մասին»: Մեր դիտարկմանը՝ դա այնքան աննշան կետ էր, որ նույնիսկ օրակարգում չի՞ ընդգրկվել, պարոն Շահգելդյանն ասաց. «Դա կարևոր կետ է: Իսկ թե ինչու չի դրվել օրակարգ կամ ինչպես է օրակարգ ձևավորվել, դժվարանում եմ ասել: Ստորագրության խնդիրը լինելու է: Ենթադրվում է ամսի տասին՝ ելնելով այն քաղաքական իրավիճակից, որ կա»:
Անդրադառնալով ԵԽԽՎ-ում տեղի ունեցածին, մասնավորապես նրան, որ Վեհաժողովը զեկույց է պատրաստելու Ղարաբաղի մասին, այն էլ խայտառակ վերնագրով, պարոն Շահգելդյանն ասաց. «Այն պատգամավորները, որոնք աջակցում են այս զեկույցին, կողմ են ադրբեջանական ռազմավարությանը»:
Մհեր Շահգելդյանի կարծիքով՝ ԵԽԽՎ-ում անհրաժեշտ է, որ լինի ԼՂՀ ներկայացուցիչ: Պարոն Շահգելդյանը ԵԽԽՎ-ի նման վերաբերմունքը չի կապում ՀՀ-ի՝ Եվրասիական տնտեսական միությանն անդամակցելու որոշման հետ:
Կարդացեք նաև
Մեր հարցին՝ ճի՞շտ էր հայտարարելը, թե չեն համագործակցում զեկույցի նախապատրաստման աշխատանքներին, այնուհետև Արտակ Զաքարյանի հայտարարությունը, թե պետք է վերանայել համագործակցությունը ԵԽԽՎ-ի հետ, պարոն Շահգելդյանն այսպես պատասխանեց. «Ինչ հայտարարվել, հայտարարվել է: Սա մի իրավիճակ է, որը մենք ուղղակի պիտի կարողանայինք նախապես հստակ տեսնել: Իմ խորին համոզմամբ՝ մենք ունեինք հնարավորություններ ազդելու գործընթացի վրա, ինչը չարեցինք, սակայն պիտի հաշվի առնել նաև այն, որ Ադրբեջանն ուներ մեծամասնություն, և այս երկրի կողմից կաշառված պատգամավորների մասին անգամ ԵԽԽՎ պատվիրակներն էին խոսում»:
Տաթև ՀԱՐՈՒԹՅՈՒՆՅԱՆ
