«Մարտի մեկի ախոյանները նույն հարթակում կանգնած ողջագուրվում են: Եթե դաշնակից եք, տասը տարի առաջ էլ դաշնակից լինեիք, մեզ իրար դեմ չհանեիք:
Մարդը ասում է, ոչինչ իմ դահիճի հետ կողջագուրվեմ, քանի որ ավելի լավ ծրագիր ունեմ: «Վարձու ինքնասպաններն» (Վահրամ Սահակյանի հեղինակային իրավունքն է) ու «օգտակար իդիոտները» հավաքվել են հարթակի վրա, մեզ էլ բանի տեղ չեն դնում»,- այսօր «Հայելի» մամուլի ակումբում խոսելով ամսի 10-ին Ազատության հրապարակում եռյակի`ԲՀԿ, ՀԱԿ եւ «Ժառանգություն», կայանալիք հանրահավաքի մասին, վրդովմունք հայտնեց ԳԽ նախկին պատգամավոր Ազատ Արշակյանը:
Նա եռյակի ուժերին զգուշացնում է. «Իրենք չգիտեն, որ ամսի 10-ի արդյունքները իրենք չեն վայելելու, դրսի ուժերն են վայելելու»:
Ազատ Արշակյանի այս դիտարկումների հետ համաձայնեց նրա ընդդիմախոս, Քրիստոնեաժողովրդավարական միություն կուսակցության նախագահ Սոս Գիմիշյանը: Նա, սակայն, չի բացառում, որ եռյակը իշխանության հետ համատեղ է գործում`քաղաքական դաշտը ամբողջովին զավթելու եւ ենթակայության տակ պահելու համար. «Երեք նախագահների ոտքերն ու ականջները տեսանելի են: Դա էլ է նորմալ, եթե կկարողանան խաբել ժողովրդին`լավ: Բայց վատ է, եթե այս ուժերը դրսից են ղեկավարվում, ինչ-որ մի պրոցես են բերում, որը կհանգեցնի ուկրաինական զարգացումների: Եթե այդ պրոցեսը դրսից չի ուղղորդվում, ես դրական եմ վերաբերվում: 2008-ին մարդիկ կանգնեցին, այդ ուժն ու էներգիան չկարողացան ռացիոնալ օգտագործել, դրա չոր արդյունքը եղավ 10 զոհ եւ 7 մանդատ: Ես հույս ունեմ, որ կծնվեն ուժեր, որոնք այս անգամ կկարողանան ճիշտ ուղղորդել շարժումը»:
Կարդացեք նաև
Սոս Գիմիշյանը կարծում է, որ մինչեւ տարվա վերջ կստորագրվի Հայաստանի`ԵՏՄ-ին անդամակցության փաստաթուղթը.«Չնայած խոչընդոտներ կարող են լինել եւ դրանցից մեկը կարող է նաեւ ներքին զարգացումները լինեն: Ըստ ճաշակի`կարող է եւ լավ լինել, եւ վատ, բայց դրականը կա եւ եթե քաղաքական էլիտան կարողանա ճիշտ օգտագործել, դրական արդյունքների կարող է հասնել երկիրը»:
Aravot.am-ի դիտարկմանը՝ եռյակը կարծես թե դեմ չէ ԵՏՄ-ին, բանախոսը արձագանքեց. «Ես էլ կուզենայի հստակ իմանալ, կիսալղոզված, անհասկանալի պատասխաններ են տալիս: Երկիրը միանշանակ գնում է Եվրասիական միություն, իրենք`կարծեք թե…, բայց կարծես թե Եվրոպային էլ են կողմ: Դա էլ դիրքորոշում է: Ի դեպ, իրենք գենդերիզացիայի օրենքին կողմ են քվեարկել»:
Ազատ Արշակյանն էլ կարծում է, որ ռուսական իմպերիան չի կարող վերականգնվել ՝ճաքերի վրա է, մանավանդ, որ երկու օր առաջ պարզ դարձավ, որ անգամ ռազմական ծախսերն են կրճատում:
Այլ մանրամասները` տեսանյութում
Նելլի ԳՐԻԳՈՐՅԱՆ
