«Ընդդիմություն լինել կամ չլինելը երկու ձև ունի. մեկը ԱԺ կանոնակարգն է, համաձայն որի խորհրդարանի նիստում պետք է հայտարարես այդ մասին, մյուսը…Այս պարագայում մենք այլ հայտարարություն չենք արել, իսկ եթե արած լինեինք, մենք այլ բան չէինք, անի, ինչ հիմա ենք անում»,- այսօր եռյակի նիստի ավարտից հետո լրագրողների հետ զրույցում ասաց ԲՀԿ խմբակցության պատգամավոր Ստեփան Մարգարյանը։ Լրագրողներից մեկը հետաքրքրվեց`Վանաձորի հանրահավաքից հետո ԲՀԿ-ն ընդդիմությո՞ւն է:
Հիշեցնենք, եռյակի երեկվա հանրահավաքում ԲՀԿ խմբակցության քարտուղար Նաիրա Զոհրաբյանը հայտարարել էր . «Այս իշխանությունը երկիրը հասցրել է փակուղի եւ այս իշխանությունը պիտի հեռանա: Սա է մեր միասնական օրակարգը»:
«Մենք անում ենք այն, ինչ ճիշտ ենք համարում: Երկրում բազմաթիվ խնդիրներ կան, որոնք համառորեն չեն լուծվում։ Նաիրա Զոհրաբյանի երեկվա հայտարարությունը բազմաթիվ անգամ մեր կողմից արվել է։ Երկրում ստեղծվել է մի իրավիճակ, երբ բավականին խորը անջրպետ է հասարակության և իշխանության միջև, և այս պահին չեմ պատկերացնում` հնարավոր է լցվի դա: Իշխանությունները ևս դրա մասին գիտեն, և դա է պատճառը, որ իշխանությունները նախաձեռնել են Սահմանադրական բարեփոխումները, որը մեկ նպատակ ունի` վերարտադրվել: Մենք գտնում ենք, որ դա թույլ տալ պետք չէ, մենք դեմ ենք դրան»,-շարունակեց Ստեփան Մարգարյանը։
Հարցին, ամսի 10-ի հանրահավաքում, հարթակից եռյակի ուժերը իշխանափոխության պահանջ դնելո՞ւ են, Ստեփան Մարգարյանը շարունակեց խուսափողական պատասխաններ տալ այն մասին, որ իշխանափոխություն ասածը ինքնանպատակ խնդիր չի:
Կարդացեք նաև
Նա սահուն անցավ կրկին սահմանադրական բարեփոխումների թեմային, որին ԲՀԿ-ն դեմ է: Aravot.am-ի հստակեցնող հարցին`«Սերժիկ, հեռացիր» կոչը ԲՀԿ-ի կողմից հնչելո՞ւ է, բանախոսն ասաց. «Մենք գործ ունենք գնացող նախագահի և նրա հետ գնացող քաղաքական իշխանության հետ։ Եթե ոչինչ չպատահի, ժամկետը լրանում է և իշխանափոխությունը կլինի այսպես թե այնպես։ Ի՞նչ պրոցես կգնա այս ընթացքում, ինչպե՞ս իրենց կպահեն իշխանությունները, մենք չգիտենք։ Եթե իշխանությունները պահեն ադեկվատ, որոշակի քննարկման խնդիր կառաջացնի: Եթե` չէ, ընթացքում կառաջանան ավելի ռադիկալ պահանջներ։ Իշխանափոխությունն արտահերթ, թե հերթական, երկրում անպայման լինելու է։ Հեռանալու ձև կա, կարելի է հեռանալ ամեն ինչ ավերելով, կարելի է հեռանալ համագործակցված»:
Այլ մանրամասները` տեսանյութում
Նելլի ԳՐԻԳՈՐՅԱՆ
